Çünki mevadd-ı musâlaha tenkīh ve elgāz u kinâyât tasrîh olunup defʿ-i mücâdele ile tasdîknâmeler mübâdele olundu. Rumeli pâyesiyle büyük elçi nasb olunan Abdülkerim Paşa'nın (15a) Rusyalu tarafına sevk ü tesyîri lâzım gelüp Şevval'in yirmialtıncı günü teslîm-i nâme-i hümâyûn için mûmâileyh Bâbıâlî'ye daʿvet ile kādim ve sadrıazam ve şeyhülislâm efendi hazerâtı mukaddemce Saray-ı hümâyûna ʿâzim olmalarıyla mûmâileyh müşârünileyhimâya tâlî olarak vâsıl-ı Saray-ı ʿâlî oldukta ihtiyâr olunan vakit hulûlünde huzûr-ı hümâyûna maʿan vazʿ-ı cebîn-i ibtihâl ve takbîl-i ʿatebe-i ulyâ ile tahsîl-i dest-mâye-i izz ü ikbâl eyledikleri hâlde hükm-i kazâ vü kader ile hem-ser olan nâme-i hümâyûnu reîsülküttâb efendi takdîm ve sadrıazam hazretleri alup elçi paşaya teslîm edüp müşârünileyhimâ birer sevb-i semmûr ile nâil-i izz-i evfer olup nâme-i hümâyûnu berârende-i dest-i ihtirâm ve kasr-ı hümâyûn pîşgâhında dîvân kâtibine iʿtâ ile hânesine azm ü hirâm eyledi. Paşa-yi mûmâileyhin sefârete dâir kâffe-i umûru rü'yet olunduğuna binâen aşr-i Zilhicce'de Defter-i Teşrîfât'ta sebt olunduğu vech üzere tertîb-i âlây olunup kemâl-i dârât ile hânesinden hurûc ve esbine süvâr ve tertîb-i dîl-firîb ile Alay Köşkü altına gelüp, esbinden nüzûl ve rû-yi zemîne ferş-i rû-yi zarâʿet ve iftihâr eyledikte bir sevb bol yenlü semmûr ile tekrâr nâil-i rehîne-i mesârr ve tertîb-i mezkûr üzere Dîvân-yoluna çıkup arz-ı debdebe-i sefâret ve me'mûr olduğu savba azîmet eyledi. Lâhika: Erbâb-ı maʿârifden olan Nahîfî Efendi beylikçi olduğu hâlde Ordu-yi Hümâyûn ile gelüp bir müddet-i yesîre istihdâm ve avâid-i kalemin nısfına kanâʿat etmek teklîfiyle tebrîd ve îlâm olunduğuna binâen hidmetinden keff-i yed ve mübtelâ-yi (15b) envâʿ-ı meşakkat ve kedd olmuşidi. Nâçâr elçi paşanın sır kitâbetine tâlib ve niyâzına müsâʿade ile bi'l-maʿiyye o tarafa zâhib oldu.