İş bu Şevvâlülmükerrem'in altıncı günü Bâbıâlî'ye leylen da'vet ile kesb-i mâye-i meserret eden ricâl-i devlet ve sâir hademe-i saltanat hâzır ve müheyyâ oldukları sadr-ı vâlâ-kadre inhâ olunup ricâl-i bâb ve defterdârân şeref-i ibkā ile kâm-rân ve yalnız küçük tezkireci vekili Selim Efendi asl ve sâbıka mektûbî vekili Mehmed Emin Efendi kethüdâ kitâbetine nakl olundu. Mansıb-ı tevkī'i ile reis-i esbak Abdullah Efendi mesrûr ve defterdâr emânetiyle Atıfzâde Ahmed Bey nâil-i etemm-i hubûr (12b) olup rûznâmçe-i evvel mansıbı Said Efendi'ye ihsân ve baş muhâsebe ile Ali Râik Efendi ferhân ve tersâne emâneti ile Sırrı Selim Efendi memnûn ve şehremâneti ile Benli Mustafa Paşazâde Abdullah Bey'in kadr ü iʿtibârı efzûn olup, sâir menâsıb dahi erbâbına tevcîh ve bu ni'met-i bî-minnetten hisse-mend olmayanların baʿzısı atâyâ-yı şâhâne ile terfîh olunup Yeniçeri Ağası Mehmed Ağa ve Bostancıbaşı Halil Ağa ve Mîrâhur-ı evvel Hacı Mustafa Ağa ve kapıcılar kethüdâsı Halil Bey ve Mîrâhur-ı sânî Said Bey ibkā ve sipâh ağalığı ile Çerkes Mehmed Bey ve silâhdâr ağalığıyla Sâdık Ağazâde Tâhir Ağa ve cebecibaşılık ile Kadri Ağazâde nâil-i eʿazz-ı matlab ü münâ ve sâir menâsıb ile erbâb-ı haysiyyet ve istihkāk-ı mazhar-ı mekârim ve işfāk oldu.