Şeyhülislâm Efendi hannâniyyet-i übüvvet iktizâsıyla mahdûmları Mustafa Bey Efendi'yi refte refte terfî'-i câh ile iʿzâz ve diraht-ı âmâlini dest-i himmetle karîn-i tebahtur ve ihtizâz etmek fikrinde olup binâberîn bu ümniyyeyi arz-ı südde-i aʿlâ ve Edirne pâyesiyle Selânik kazâsını mahdûm-ı mûmâileyhe ricâ ve arzına müsaʿade-i seniyye-i cihân-dârî erzânî ve zikr olunan rütbe ve mansıb ile pâ-nihâde-i medâric-i kâm-rânî oldu. Sâbıka Üsküdâr kadısı Veliyyüddîn Efendizâde Mehmed Emin Efendi'nin bi-hasebi't-tarîk Şam-ı şerîf kazâsıyla küll-i mutarrâ-yı kadr ü iʿtibârı güşâde ve Haleb kazâsiyle Kuş adalı Mustafa Efendi'nin mürg-i emeli (13a) mahbes-i medârisden âzâde kılınıp Trabzonî Mehmed Efendi dahi Kuds-i şerîf ile dest-zen-i şevk ü tarab ve vukūʿ bulan silsileden hazz ve nasîbi olan müderrisîn-i kirâm dahi hâllerine göre nâil-i maksad u ireb oldular.