Kāimmakāmlık ile yeniçeri ağalığını cemʿ eden Vezîr Yeğen Mehmed Paşa Aydın muhassılı nasb u taʿyîn ve Mehmed Ağa müşârünileyhe câ-nişîn kılındı. Şehriyâr-ı sütûde-girdâr hazretlerine şehzâdelikleri evânında birer cihetle kesb-i temahhuz ve ihtisâs edenler derece-i kurbiyetlerine nazaran melhûz-ı nigâh-ı re'fet ve mekârim ve ihrâz-ı merâtib ve kesb-i fevâid ü megānim ile mahsûd-ı halâyık u avâlim olup taraf taraf kâr-sâz-ı umûr ve mâ-yu'avvel-i cumhûr olmuşlar idi. Devletini hazm ile dâire-i hadd ü edebi tecâvüz etmeyenler câh u ikbâl ile pâyidâr ve semt-i hırs u tamaʿa sülûk ile mekkâr-ı umûra tasaddî edenler dûr-bâş-ı tevbîh ve muʿâheze ile mahall-i ibret-i veliyyü'l-ebsâr oldular. Tefâsîl-i hâlleri inşâallah zîrde zikr ü îrâd ve tehzîb-i ahlâk u istikmâl-i nefs dâ'iyesinde olanlar ikāz ve irşâd olunur.