Garîbe: Sinîn-i çendinden berü Ordu-yı hümâyûnda zahmet-i sefer ile muztarr olan ricâl-i devlet Âsitâne-i saʿâdet'e gelüp istikrâr-ı makām ve nevâziş ü ikrâm ile bekâm olmak ümniyesinde iken kimi hilâl-i tarîkde ve kimi Dârüssaltana'da tecerrüʿ-i kâs-i azl ü infisâl ve hey'et-i mütenekkire ile erbâb-ı töhmet gibi vâhiden baʿde vâhid hânelerine gelüp [Mısraʿ]: radîtu mine'l-ganîmeti bi'l-iyâb makālesini güzârende-i lisân-ı hâl eyleyüp şerîf ü vazîʿ bu keyfiyeti emr-i beşîʿ görüp himmetlerine fütûr ve saʿy ü kûşişlerine kusûr târî olmuşidi. Mısır seferi avdetinde giriftâr-ı meşâkk u metâʿib olan ashâb-ı merâtib ve sâir hademe-i devlet vâsıl-ı Âsitâne-i saʿâdet oldukları hîn-i şehriyâr-ı İskender-i temkîn dâme fî avni'l-meliki'l-muʿîn hazretleri hizmetlerini zâyiʿ buyurmayıp cümlesini makāmlarında ibkā u takrîr ve deycûr-ı hâne-i emellerin envâr-ı âtıfet-i cihân-bânîleriyle tenvîr buyurdukları kemâl-i adl ü nasafet-i hümâyûnlarını isbât ve te'yîd ve zamân-ı saʿd-ı (6a) iktirânlarında sadâkat-kârân-ı erbâb-ı sefer ü hazara her bâr hüsn-i mükâfât ve cezâ hasâis-i mülûkânelerinden olduğunu ezhân-ı âliye ashâbına rûşen ü bedîd buyurdular.