Edirne'de bir kıst mevâcib kul tâyifesine tevzîʿ ve cümlesinin dâyire-i maʿîşetleri tevsîʿ olundukdan sonra, şeref-yâfte-i sudûr olan hatt-ı hümâyûn mantûku üzere Edirne'den hareket ve tayy-ı merâhil ve katʿ-ı menâzil ederek, selh-i cumâdelâhirede Küçük-çekmece'ye vusûl ve yevm-i mezkûrda Sadr-ı cedîd içün otak nasb olunup, ferdâsı mahall-i mezkûru teşrîf ile ricâl-i Ordu-yi hümâyûn'u nazar-ı nevâziş ü iltifâta meşmûl eylediler. Recebü'l-müreccebin gurre-i garrâsı olan yevm-i hamîs Sadr-ı müşârun ileyh merhale-i mezkûreden refʿ-i eskāl ve İncirli Karyesi'ne sâye-endâz-ı iclâl oldukda, Livây-ı şerîf'i istikbâl içün âyende olan Şeyhülislâm Efendi ve Nakîbü'leşrâf ve sâyir sudûr-ı ʿizâm ve Mevâlî ve Müderrisîn-i kirâm ile salât-ı subh edâ olundukdan sonra müretteb alay ile İncirli'den hareket ve Dâvud-paşa'ya doğru ʿazîmet eylediler. Şehriyâr-ı enâm hazretleri dahi o vakte dek Dâvud-paşa Serâyı'ndan bir ablak sîm endâma rükûb ile Livây-ı meymenet-iltivây-ı hazret-i Seyyidü'l-Enbiyâ'yı ber-vech-i taʿzîm ü ibcâl istikbâl eyleyüp, Dâvud-paşa Sahrâsı'nda nasb olunan otak-ı cevâz-nitâk-ı Şâhâne'lerine zıll-efgen-şevket ve bir lahza ittika-pîrây-ı visâde-i istirahat ʿakabinde, dürr-i yektây-ı zât-ı hümâyûnlerine sadef ve âfitâb-ı ʿâlem-tâb-ı hüsrevânelerine beytü'ş-şeref olan serây-ı dil-güşâlarına [M2 313] kemâl-i haşmet ü şân ile ʿatf-ı ʿinân buyurdular. Bundan sonra matbah-ı Keykâvûs'a taʿne-zen olan Matbah-ı ʿâmire'lerinde tabh olunan lezâyiz-i etʿime ve hûrdenî ile fakīr u gınâ ve şerîf ü denî dilsîr-i niʿmet ve çâşnî-yâb-ı sunûf-i lezzet olup, Sadrıaʿzam yine alay ile Serây-ı hümâyûn'a gelüp, huzûr-i hümâyûnda ser-be-zemîn-taʿzîm olarak Livây-ı Şerîf'i yeden-bi-yedin teslîm eylediler.