Sadrıaʿzam'ın vefâtı haberi vâsıl-ı semʿ-i [M2 312] hümâyûn oldukda, Sadâret istiʿdâdı verilen Kāyim-makām ʿİzzet Mehmed Paşa cumâdelâhirenin ikinci çeharşenbih günü huzûr-i mülûkâneye daʿvet olunup, iʿtây-ı mühr-i hümâyûn ve iksây-ı ferve-i Sadâretle derece-i kadr u iʿtibârı efzûn kılınup, Ordu-yi hümâyûn'da Kāyim-makāmlık dahi, Yeniçeri Ağası olan Yeğen Mehmed Paşa'ya tevcîh ve bu keyfiyyeti nâtık Mîrahûr-i Evvel Ağa bir kıtʿa hatt-ı hümâyûn ve hılʿat-i seniyye getürüp, müşârun ileyhin dahi bu vechile şân ü rifʿati tenvîh olundu. Sadr-ı müteveffânın emvâl ü eşyâsı altı günde tahrîr ve beş yüz kîseye bâliğ olan nakdi ile Edirne'de bir kıst mevâcib verilmesi tedbîr olundu. Rikâb-ı müstetâbda birkaç seneden berü Reʾîsülküttâb olan Râʾif İsmâʿîl Beyefendi'nin kemâl-i sadâkat ü dirâyetine binâʾen, bi'l-fi'l Reʾîsülküttâb olması rekîz-i zamîr-i Şehriyâr-ı ʿâlem-gîr olduğuna binâʾen, cumâdelâhire evâyilinde hıdmet-i mezkûre ile tatrîb ve Bâb-ı ʿâlî'ye kemâ-kân takrîb olundu.