Müşârun ileyh üç seneye karîb Serdâr-ı ekrem ve mâlik-i zimâm-ı tasarruf-ı ümem olup, zemânında baʿzan nusrat ve baʿzan hezîmet vukūʿuyla, fart-ı gayretinden mehmûm ve giderek ʿillet-i samem ve sâyir emrâz ile resîde-i maʿraz-ı ecel-i mahtûm olup, şöyle ki Şumnu'dan altı sâʿat müfârakatında bi'l-külliyye ekl ü şurbdan munkatıʿ ve kuvâ ve cevârihinden tâb ü tüvân münteziʿ olup, ne hâl ise Karinâbâd'a iki sâʿat kalarak, bir karyeye vusûl ile ordunun ilerüye geçmesini fermân ve ferdâsı orduya hezâr mihnetle revân olarak, bir gün oturak olunmasını beyân etmişidi. Cumâdelûlânın yirmi altıncı hamîs günü taht-ı revân ile Karinâbâd'a gelür iken muntasıf-ı râhda mürg-i rûhu kafes-i tenden cüdâ ve me'vây-ı kadîmine bâl-güşâ oldu. Nâʿşı dört çift bârgîrli ʿarabaya tahmîl ve otuz altı sâʿatde Edirne'ye tavsîl olunup, Eski Câmiʿ sahasında vâlidesi cenbinde medfûn ve hakkında sû-be-sû istirhâm-ı ʿafv-ı Hâlik-ı Bîçûn kılındı. Müteneffisân-ı Ordu-yi hümâyûn maʿrifetleriyle mühr-i hümâyûn Livây-ı şerîf sandukasına vazʿ- u temhîr ve keyfiyyet Rikâb-ı hümâyûn tarafına ʿarz u tahrîr olundu. Müşârun ileyh vüzerây-ı ʿizâm hazerâtının mâldâr [M2 310] ve sâhib-i iktidârlarından olmağla, Karinâbâd'da mevcûd olan eşyây-ı firâvânı cümle maʿrifetiyle hatem ve Edirne'ye îsâl ve Âsitâne-i saʿâdet tarafından vürûd eden Mîrâhur-i Evvel Ağa'ya teslîm ve Hazîne-i hümâyûn'a idhâl olundu. Mütevaffây-ı müşârun ileyhin nâʿşı on gün kadar Edirne'de mütevârî-i hâk olmuşiken, İstanbul'a nakli fermân olunup, aʿzây-ı fersûdesi hezâr külfetle ihrâc ve hazret-i Hâlid civârında iʿdâd olunan mezâra idrâc olundu. Nazm: Elâ inneme'd-dünyâ gadâratü eyketin, İzâ ahdarra minhâ cânibün ceffe cânibü Ve mâ-hâzihi'l-eyyâmü illâ fecâyiʿun Ve-me'l-ʿîşu ve'l-lezzâtü illâ mesâyibun. Sadrıaʿzam'ın vefâtı sebebi ile Ağa Paşa'nın Ordu-yi hümâyûn'a gelmesini erkân-ı devlet istisvâb ve bu keyfiyyet ʿarz-ı südde-i nüh-kıbâb kılınup, Kul Kethudâsı Ağa ocağlu ile gelmek üzere gerüye tevkīf ve Ağa Paşa orduya gelüp, Edirne'ye dek iktizâ eden umûru mecrây-ı kadîmi üzere tasrîf eyledi.