Birkaç seneden berü metâʿib-i seferiyye ile mübtelây-ı envâʿ-ı mesâyib olan sunûf-i askerî ve küttâb-ı aklâm ve sâyir ru'esâ ve ricâl-i devleti fî-mâ-baʿd sahrâlarda bilâ-sebeb meks ü tevkīf revâ-dâşte-i tabʿ-ı Âsafî olmadığından gayri, Şumnu'da müddehar olan zehâyir on gün kadar askere vefâ etmeyeceği zâhir olmağla, işâʿat-ı hareket ile cümleyi ser-germ-i neş'e-i ferhat edüp, cumâdelûlânın yirminci günü Şumnu'dan hizâm-bend-i nehzat ve hâric-i şehirde mansûb haymede vakfe-gîr-i istirâhat oldu. Livây-ı saʿâdet-iltivâ ʿalâ sâhibihâ efzalü't-tehâyâyı kānûn üzere sandukasına tevdîʿ ve ʿarabasına tahmîl etdikden sonra Sadrıaʿzam Edirne cânibine sevk-i ʿAlem ve bir gün sonra ocağlu dahi tertîb-i kadîmleri üzere tahrîk-i kadem eylediler.