İnʿikād-ı sulh hasebiyle fî-mâ baʿd Şumnu'da ikāmet ʿabese iştigāl kabîlinden olduğuna binâ'en, Bosna Vâlîsi Vezîr Dağıstânî ʿAli Paşa Şumnu'ya Muhâfız nasb ü taʿyîn ve serhadlerde olan sâyir vüzerây-ı ʿizâm dahi yerlü yerinde temkîn olunup, murahhaslara müceddeden taraf-ı hümâyûndan verilen ruhsat-nâme dahi yedlerine vusûl ve senedleri ihticâca salâhiyyet kabûl edüp, Mareşal tarafından iʿtâsı lâzım gelen tasdîknâme taraf-ı Serdâr-ı ekremî'ye resîde [M2 309] ve bi'l-külliyye bisât-ı ʿadâvet berçîde oldu. Şumnu civârında olan küffâra dahi Mareşal tarafından haber vârid ve fi'l-hâl ordusunu kaldurup, Boğdan tarafına râciʿ u ʿâyid oldu.