Bükreş mükâlemesinde Kılburun'un hedmiyle iktifâ ve iddiʿây-ı tazmîn ilgā olunup, mâdde-yi ticaret dahi cerh u taʿdîl olunmak ve Kırım'dan Devlet-i ʿaliyye katʿ-ı ʿalâka etmemek zımnında kalʿa binâsı gibi sühûlet-i maslahat muhakkak iken, bir sene sonra [M2 307] münʿakid olan sulhda ne derece tefâvüt olup, düşmen ne mertebelerde fâyide-mend olduğu ednâ mülâhaza ile maʿlûm olur. Cengde iksâr-ı vezâyif-i cünûd ile itlâf-ı emvâl ve tekâlîf-i şâkka-i zarûriyye ile memâlikde tevellüd-i ihtilâl, vâreste-i kayd-ı istidlâl olup, bâ-husûs cengde zafer ü nusrat mevhûm ve sulhda râhat ü âsâyiş meczûm olup, meczûmu mevhûme ve maʿlûmu mechûle tercîh, nakşbendân-ı kâr-hâne-i umûr olan hükemây-ı eslâfın şiyem ü ʿâdetlerinden olduğu kitâplarında tasrîh olunmuşdur. “Recaʿnâ ilâ mâ künnâ fîhi”. Münʿakid olan musâlaha senedlerinin birer sûreti murahhaslar tarafından Ordu-yi hümâyûn'a vâsıl ve bu keyfiyyetden cümleye inbısât-ı tâm hâsıl olup, Serdar-ı ekrem tarafından tasdîknâme tahrîr ve murahhaslar tarafına tesyir olunup, baʿde'l-mübâdele murahhaslar ʿavdet ve ahbâr-ı sulh etrafda olan askere tahrîr ü işâret olundu. Yeniçeri Kâtibi Efendi ʿarz u mahzarı südde-i aʿlâya takdîm ve bu sûretle sulhun cevâzını ʿulemây-ı aʿlâm teslîm eylediklerine binâ'en, ruhsatı mutazammın bir kıtʿa hatt-ı hümâyûn şeref-rîz-i vürûd olup, kulûbda olan hafakān zâyil ü mürtefi ve maslahatda mevhûm olan tereddüd müntefî vü mündefiʿ olup, herkes şâd ü hurrem ve reʿâyâ vü berâyâ vatanlarına ʿavdet ile âzâde-i derd ü gam oldular.