Tasarrufât-ı mülkiyyede beyne'd-düvel muvâzene bir emr-i muʿteber ve mülk-i âhara bir devletin hırs u teʿaddîsi cemîʿ-i devletlerin ittifâk ve kahr-ı müteʿaddîye hücûmlarını istilzâm etmek resm-i mukarrer iken, nev-hudûs olan devletlerde el-hâletü hâzihi bu tavr-ı mergūb metrûk ü mühmel ve ahadühümâ âhardan intizâʿ-ı emâkin ü arâzî kasdıyla rasad-bîn-i mekr ü hiyel olup, nazm: Ez-zulmü min şiyemi'n-nüfûs Fe-in tecid zâʿifetün fe-leʿallehü lâ-yezlüm mefhûmunca tabâyiʿ-i nâs ki, şerr u fesâda mecbûl ve ʿale'd-devâm celb-i zevâyid ve taleb-i fevâyide meşgūliyyet ile izhâr-ı temelluk etmesi bir ʿillet ile maʿlûldür. Kahr-ı zaʿîf ve istidlâl-i mehzûl ve nahîfe bi't-tabʿ mâyil olmaları haysiyyeti ile devletlerden biri takdîr-i Mâlikü'l-mülk ile hasmına mağlûb ve mülâhaza-i mazarrat-ı müfrita ile râhatı meslûb olduğu hâlde, sulha râgıb olduğunu mücâviri olan devletler ihsâs ile hem-hudûd oldukları emâkinden bir kıtʿa arâziye medd-i yed ve yâhûd [M2 308] semm-i muvakkat nevʿinden olan baʿzı şurût-i fâside inʿikādı zımnında tasʿîr-i had etmek tabîʿat-i maslahatlarından olduğu, mücerreb-i erbâb-ı kabûl ü red olup, binâ'en ʿalâ zâlik Nemçelü bu seferde Devlet-i ʿaliyye'ye iʿânet ve hasmı olan Rusyalu'ya izhâr-ı ʿadâvet ile lede'l-iktizâ cenge mübâşeret mukāvelesini hafî olarak temhîd ve bu şartı hudûda baʿzı asker sevkiyle gûyâ te'kîd etmişidi. Daʿvâ etdikleri muzâharet ve iʿlân-ı cenge müteʿallık taraflarından bir eser ü ʿalâmet zuhûr etmeyüp, mesârıf nâmıyla Devlet-i ʿaliyye'yi min ciheti'n-nakd ızrâr ve Boğdan memleketinden dokuz kazâlık arâzîyi hâh ü nâ-hâh kabza-i tasarrufa alup, Devlet-i ʿaliyye altı sene zarfında hasmıyla vâkiʿ olan muhârebede yorgun olup bu zararı zarûrî hazm etdiği maʿlûm-i serîre-şinâsân-ı rûzgârdır. Nemçelü karîbü'l-ʿahdde Moskov ve Prusya cenglerinde zaʿîf ve nâ-tüvân ve memleketi elden gitmek derecelerinde tezelzülü nümâyân olup, her taraftan Devlet-i ʿaliyye'yi düvel-i sâyire tahrîk ü teşvîk ve mukaddemâ terk olunan kılâʿ u bukāʿın istirdâdına zâmin olarak irâ'e-i tarîk etmişler iken, bilâ-sebeb nakz-ı ʿahd şe'âmetini tehayyül ve zebûn-küşlük maʿarratından istiğnâ ile izhâr-ı sûret-i tegāfül eylediği Nemçelü'nün dahi maʿlûmu iken, bâlâda beyân olunan agrâz-ı düvel iktizâsıyla maslahatını itmâm ve intihâz-ı fursat ile tahsîl-i merâm eyledi.