Cumâdelûlânın yedinci günü Devlet-i ʿaliyye murahhasları Mareşal ile Kaynarca'da mülâkāt edüp, ʿan-asl Sadrıaʿzam ile mevâdd-ı musâlaha bi'l-mükâtebe karârgîr-i nizâm olup, temessükler tahrîrinden gayri bir maslahat kalmadığını işrâb ve Repnin Cenerali bu maslahata taʿyîn ve bir iki gün zarfında inʿıkādını tebyîn ile katʿ-ı cevâb edüp, mükâlemelerde güzerân eden mebâhis kabûl-i tekerrür ve müddeʿây-ı tarafeyn tekessür ederek Özi ve Hoca-bey mukābelesinde Kılburun ve Kerş ve Yeni-kalʿa tasdîk olunmadıkça, saded-i âhar lisâna alınmayacağını katʿîce ifâde ile meclis ferdâya taʿvîk ve yevm-i mezkûrda yine Mareşal ile ʿakd-i meclis olunup, Rusyalu'nun müddeʿâsı istîzâna taʿlîk-ı irâde olundukda, Mareşal râzî olmayup: “Be-her hâl bunlar tasdîk olunmaludur” dedikde, bi'z-zarûra tasdîk olundu. Kusûr mâddeler dahi pezîrây-ı nizâm ve cumâdelûlânın sekizinci günü târîhiyle yirmi sekiz mâddeyi şâmil senedât-ı tarafeyn temhîd ü ihtitâm ve altı seneden berü müşâhade olunan ekdâr ü âlâm, fazl-ı cenâb-ı Münaʿâm ile mübeddel-i âsâyiş ü ârâm oldu.