Cünûd-i İslâmiyye'nin bir sınıfı, muhârebede mecrûh olan ʿAbdullah Paşa ile Pravadi (Provadia) üzerinden Balkan'ı aşup, Karin-âbâd tarafına ʿazîmet ve kusûru bi'l-cümle ru'esâ ile Ordu-yi hümâyûn'a ricʿat ve bu keyfiyyet-i [M2 300] müdhişeden Sadrıaʿzam'ın hâsse-i sâmiʿası derece-i taʿtîle resîde ve bundan sonra ne gûne hareket ede- ceği fikriyle kadd-hamîde olmuşiken, rebîʿulâhırın on beşinci günü düşmen-i dîn Kozluca'dan Şumnu kasdıyla kıyâm ve atlusu Yeni-pazar'a doğru geldiğini ilerüde bulunan Dağıstânî ʿAli Paşa iʿlâm etmişidi. Düşmenin Şumnu'ya geleceği muhakkak olup, hâric-i şehirde mütevekkilen ʿalallâh muhârebeye ihtimâm olunmak ve zafer mümkün olmadığı takdirde iki seneden berü istihkâmıyla tekayyüd olunan şeranpolar verâsında düşmen ile ez dil ü cân ceng etmek tedbîrini, erkân-ı devlet meclis-i meşveretde tebyîn ve herkes bu re'yi tahsîn eyledikleri hâlde, Dağıstânî ʿAli Paşa dahi Ordu-yi hümâyûn'a gelüp, aʿdânın Yeni-bazar bayırına nasb-ı hıyâm etdiklerini ifâde ve Ordu-yi hümâyûn kurbunda müceddeden meterisler hafr edüp, cenge âmâde oldular. Ordu-yi hümâyûn'da sekiz bin kadar süvârî mevcûd ve hulûs-i kalb ile mukāvemet miyânelerinde meşrût u maʿhûd olup, Dağıstânî ʿAli Paşa maʿiyyeti ile çerhaya taʿyîn ve muharebe ederek, düşmeni meterislere celb etmek tenbîhâtı müşârun ileyhe tavsiye vü telkīn olundu.