Bir müddetden berü düşmenin ahvâline ıttılâʿ mümkün olmadığından, el-yevm ne mahallerde oldukları istihbâr olunmak siyâkında Bazarcık Serʿaskeri Dağıstânî ʿAlî Paşa'ya hükm-i şerîf ısdâr olunmuşidi. Müşârun ileyh dahi Kethudâsı'nı Karasu'ya ve Babadağı'na dek irsâl ve o taraflarda aʿdâdan bir kimse olmayup, fakat Hırsova'da bir iki yüz kadar kâfir mevcûd olduğu haberi ile Bazarcığ'a ʿavdet eylediğini müşârun ileyh ʿarz-ı huzûr-i Sadr-ı bedîʿul-fiʿâl etmişidi. Ancak Kethudâsı tecessüsde ʿadem-i ihtimâm ve Bazarcığ'a beş on sâʿat mahalle dek düşmen ittihâz-ı makām eylediği Deli-orman halkından dil talebiyle gidip gelenlerden istifhâm olunmuşiken, bu hilâlde düşmenin sekiz sâʿat mahalde karagolları nümâyân ve baʿzan miyânelerinde iʿmâl-i tîğ ü sinân olduğunu müşârun ileyh Sadrıaʿzam'a tahrîr ü beyân eyledikde, inhâsında televvün ve mugāyeret fehm olunduğundan, maglatasına haml ile vaktinde icrây-ı lâzime-i tedbîr ve irsâl-i asker ile selb-i taksîr kılınup, cell-i himmet Hırsova istihlâsına masrûf vürûd eden asker cânib-i mezkûr içün mevkūf olup, düşmen-i dîn bu meşgale hilâlinde Bazarcığ'a mühâcim ve berü tarafdan dahi mukavemete ʿâzim olarak feth-i derîce-i hısâm ve iki tarafdan âteş-i harb karîn-i iztırâb olup, asker-i İslâm'ın ekserîsi süvârî ve cemʿiyyetleri top ve piyâdeden ʿârî olmak hasebiyle, düşmenin âteşine tâb-âver olmayup, perîşân ve hîn-i maʿrekede ser-bâzân-ı [M2 297] muvahhidînden vâfiri ihrâz-ı rütbe-i şehâdet ve Bin-başı Battal Bey ve Kapucu-başı Turhan Ağa cerîhan esîr olup, aʿdâdan dahi vâfir kefere müste'sıl-i seyf-i celâdet ve bu hâl ile bakıyye-i asâkir-i İslâm Kozluca'ya gel- diklerini Serʿasker Paşa tahrîr ü işaret edüp, der-ʿakab Hırsova üzerine tertîb olunan askerin tekmîl-i lâzimelerine ikdâm ve Bazarcık üzerine ʿazîmetleri iltizâm olundu.