Tûğ ihrâcından otuz gün sonra Serdâr-ı ekrem hazretleri Livây-ı feyz-iltivây-ı hazret-i fahru'l-Enbiyâ'yı pîşvây-ı mevkib-i hümâyûn eyleyerek, Şumnu Sahrâsı'nda bir iki gün mukaddem nasb olunnan hıyâma nüzûl ve ahvâl-i ceng ile meşgûl oldu. Vakt-i muhârebe mukārebe üzere olup, ceng-cûyân-ı İslâm'ı tahrîz zımnında taraf-ı hümâyûndan munfasıl ve meşrûh bir kıtʿa hatt-ı hümâyûn ve bir sevb-i semmûr ve bir kabza mücevher hançer Mîrâhûr-i Evvel el-Hâc Mustafa Ağa ile vürûd edeceği istihbâr ve müretteb alay ile istikbâl olunup, teşrîfât-ı seniyye ile Sadr-ı kâm-kâr hâyiz-i rehîne-i istibşâr oldu.