Eyyâm-ı behâr kudûmüyle, Ordu-yi hümâyûn'un sahrâya hareketi beyyinü'l-lüzûm olduğundan fazla, asâkir-i mürettebenin bir ân akdem vürûduna medâr olmak mülâhazasıyla, şehr-i [M2 294] saferin yirmi ikinci günü tûg-ı Âsafî ihrâc ve pâ-pîn-i nerdübâna rekz ile kazâyây-ı istiʿcâl-i asker mukaddimeleri intâc olundu. Mahzâ rûhâniyyet-i Nebiyy-i muhtârdan istiʿâne vü istinsâr niyyet-i hâlisasıyla, Mevlid-i hazret-i Nebevî kırâ'eti tasmîm ve birkaç seneden berü Ordu-yi hümâyûn'da mukīm olup, sened-i ʿâlî ile fenn-i Hadîs'e müntesib ve hıfz-ı Buhârî-yi şerîf ile sunûf-i feyz ü bereketi mükteseb olan Medenî Mehmed Efendi takdîm olunup, luhûn-i ʿArabiyye ve savt-ı şeciyye ile o Sâlâr-ı gürûh-i enbiyâ ʿaleyhi mine's-salâti ezkâhâ hazretlerinin ʿâlem-i vücûda kadem-nihâde-i saʿâdet oldukları keyfiyyâtını hâzır olan vüzerâ ve vükelây-ı devlete takrîr ü tekmîle muvaffak olduğu, Buhârî-yi şerîf hatmin dahi edüp, edmiga-i sâmiʿîni misk-i ezfer-i rûhâniyyetle taʿtîr eyledi.