Silahdar-ı hazret-i Şehriyârî olan Boşnak ʿAbdullah Ağa'da, emâre-i kābiliyyet ve istiʿdâd-ı Vezâret ihsâs olunup, muharremül-harâmın yirminci günü Anadolu'nun Sağ Kol askerini Ordu-yi hümâyûn'a sevk u ihrâc me'mûriyyeti ile mûmâ ileyhe rütbe-i Vezâret ihsân ve fetîle-i bahtı şuʿle-i eltâf-ı Şâhâne ile mütevakkıd ü firûzân kılındı. Rikâb Defterdârı olan ʿOsmân Efendi dahi zımnen istiskāl ve maʿnen Anadolu'nun Sol Kol askerini sevk ve Ordu-yi hümâyûn'a irsâl irâdesiyle câh-ı menîʿ-i Vezâret'e iʿtilâ etdiyse dahi, fi'l-asl mübtelây-ı ʿillet-i vücûd ve hücûm-i şeyb ile derece-i sittîne suʿûd ve bu mülâbese ile aʿbâ-i Vezâret'i tehammüle yârâ vü istitâʿati mefkūd olduğunu beyân ve müteşebbis-i dâmen-i ʿafv ü gufrân olmuşidi. Niyâzı dâhil-i semʿ-i kabûl olmayup, hâh ü nâ-hâh savb-ı me'mûriyyete ʿazîmet ile sevk-i cünd ü sipâh eyledi. Münhal olan Rikâb Defterdarlığı, Çavuş-başı olan ʿAtıf-zâde ʿÖmer Vahîd Efendi'ye ve Çavuş-başılık vekâleti el-Hâc Mehmed Recâyî Efendi'ye tevcîh ve nigâh-ı ʿâtıfet ile termîz ve Riyâset-i Küttâb vekâleti baʿde'l-lüteyyâ ve'lletî altı seneden berü o şugl-i hatîr ile sadâkati felek-mesîr olan Râyif İsmâʿîl Beyefendi'ye kemâ-kân ihâle vü tefvîz olundu.