Şehr-i Zilkaʿdenin yedinci günü tevcîhât vukūʿ bulup, hademe-i Bâb-ı ʿâlî ibkā ve Büyük Tezkireci İbrâhîm Efendi Büyük Rûz-nâme mansıbı ile be-kâm ve kırk elli gün zarfında gidüp gelmek üzere izin alup, [M2 293] mansıbı Küçük Tezkireci olan ʿAbdî Efendi Yeğeni el-Hâc Mustafa Efendi'ye ve Küçük Tezkirecilik, Süleyman Feyzî Efendi'ye sezâ görülüp, Teşrîfâtî olan Enverî Efendi ʿazl ve Cebeciler Kitâbeti'ne zulmen tenzîl ve Sadrıaʿzam Dîvân Kâtibi Mehmed Efendi, hidmet-i mezkûreye tavsîl olundu. Bundan akdem Nuʿmân Bey, Mektûbçuluk'dan maʿzûl ve yerine Bekir Paşa-zâde ʿAtâʿullah Beyefendi vusûl ile nâyil-i eʿazz-i me'mûl olup, gerçi mîr-i merkūmun Silahdâr Kitâbeti ile hâtır-ı meksûru mecbûr kılınmışidi. Ancak nazarı hıdemât-ı Bâb-ı ʿâlî'de olduğunu Serdâr-ı ekrem intikāl ve fi'l-asl mahfûf-i nazar-ı Âsafâneleri olduğundan, bu defʿa Kethudâ Kitâbeti ile merkūmu münşerihu'l-bâl eylediler. Menâsıb-ı sâyire dahi erbâbına tevcîh ü ibkā olundu.