Fart-ı şecâʿatle nâmdâr ve bu sâl-i ʿibret-iştimâlde Varna'yı eyâdî-yi düşmenden istihlâs ile kesb-i iftihâr ve nâmını mukayyed-i cerîde-i ebrâr eden Vezîr Kelleci ʿOsmân Paşa, Varna gāyilesini ber-taraf etdikden sonra donanmayı Tersâne-i ʿâmire'ye irsâl ve kendüsü bizzât Varna'yı muhâfaza etmek bâbında tarafına ısdâr-ı misâl olunmuşidi. Birkaç günden sonra derd-i ser-i dünyâdan keff-i yed ve ʿazm-i dâr-ı bekā ile ihrâz-ı hayât-ı sermed eyledi. Müşârun ileyh Gürciyyü'l-asl ve Rüstemiyyü'n-nesl olup, Segbân-başı Dalkılıç Mehmed Ağa'nın silk-i mülküne intizâm ve giderek Yazıcı-zâde İbrâhîm Paşa'ya tedrîc ile Kethudâ ve baʿzı hıdemâtda bulunarak, Kapucu-başılık ile tahsîl-i sît ü nâm eyledi. Baʿde-zemân Âsitâne-i saʿâdet'e vürûd ve baʿzı hıdemât-ı hâyilede istihdâm olunarak, Kellecilik ile isbât-ı vücûd etmişidi. Seksen iki târîhinde Silahdâr Ağalığı ile mümtâz ve o aralıkda bir hidmet ile Mısır'a taʿyîn olunup, vâlîsi gürûh-i mevtâya hem-râz olduğundan, Tevliyyet-i Mısır ile rütbe-i Vezâret'i ihrâz etmişidi. Haber-i Vezâret tarafına vürûd etmezden mukaddem Mısır'dan hurûc ve İstanköy'de vâkıf-ı hâl ve bir sene kadar ʿAli Bey hâdisesiyle imrâr-ı eyyâm ü leyâl ve seksen dörtde Sivas'a Vâlî ve der-ʿakab Tırhala Sancağı'yla kadri ʿâlî olup, baʿdehû Mora ve Eğriboz sancaklarını tasarruf ve Varna'da vech-i meşrûh üzere berîd-i çâpük-süvâr hayâtı tevakkuf eyledi. Müşârun ileyh ʿâkil ü müdebbir ve hoş-mend ve mutabassır, îkāʿ-ı tehdîde kādir bir Vezîr-i behâdır idi.