Sadr-ı esbâk el-Hâc Halîl Paşa bir müddetden berü Filibe'de mukīm ve muntazır-ı bürûz-i lutf-i Hudâvend-i ʿalîm olmuşidi. Bu hilâlde ibkā-yı Vezâreti'ne müsâʿade-i seniyye erzânî ve evâyil-i şevvâlde Eğriboz Sancağı tarafına tevcîh ile mazhar-ı ʿavârıf-1 Cihân-bânî oldu. Karasu'da esîr olan ʿÖmer Paşa ve Hacı İspir Ağa'nın birer kıtʿa ʿarîzaları Mareşal tarafından Ordu-yi hümâyûn'a vârid olup, Serdâr-ı ekrem ve sâyir kibâr u münʿimân-ı devlet taraflarından müşâr ve mûmâ ileyhe hedâya tertîb ve mekâtîb-i tesliyet-âmîz ile icrây-ı lâzime-i tatyîb olundu. Âsitâne-i saʿâdet'de mukīm Prusya Elçisi, Kılburu'nun fekat hedmiyle sulha müteʿahhid olduğunu şâmil südde-i Saʿâdet'e ʿarz-ı takrîr edüp, Rikâb-ı müstetâbda olanların baʿzısı bu sûreti lutf-i sarîh ve baʿzısı zişt ü kabîh farz etdiğinden, Şehriyâr-ı dîndâr emreyn beyninde mütereddid ve bu keyfiyyeti telhîs içün Serdâr-ı ekrem tarafına hatt-ı hümâyûnları vârid olmuş idi. Müşârun ileyh kable't-telhîs Rusya Feldmerşal'iyle istimzâc semtine zehâb ve irsâl etdiğin mekâtibde her bâr daʿvây-ı ihlâs ile sulha meyl ü rükûn izhâr etdiğin muhakkak ise, Prusya [M2 292] Elçisi'nin bu defʿa müteʿahhid olduğu sûretle: “ʿAkd-i sulha şurûʿ” edelim deyü bir kıtʿa mektûb yazup, bu cevabları işrâb eyledikde, Rusya Merşali bu kazıyyeden katʿâ haberi olmadığını ifâde ve giden âdemi iʿâde eyledikde, mektûb tahrîrinden nâdim ve taraf-ı hümâyûna teveccühle takrîr yazacağında mütehayyir u hâyim olup, o hilâlde tabʿ-ı hümâyûnda küllî inhırâf haberleri münteşir-i etrâf olduğundan, tarassud-i encâm ile mâddeyi nihâde-i ceyb-i iktitâm eyledi.