Her hâlde şart-ı hazm ü ihtiyâta riʿâyet ile fikr u endîşe-i ʿavâkıb, [mısra]: Fe-in sellemte femâ fi'l-hazmi min be'sin ictihâdında olan kâr-âzmûdegân-ı cihân ʿindinde olan reʾy-i sâyib ve bir emr-i muʿteber ü münâsib olduğuna binâʾen, Şumnu Kasabası'na hendek hafrı ve şeranpo binâsı mukaddemâ tasvîb olunup, etrâfdan ʿamele celb ve itmâma karîb olmuşidi. Meştâya duhûlden sonra bakıyye-i binâ ocağlara kıtʿa kıtʿa taksîm ve destyârî-yi erbâb-ı himmet ile bidâyet ü gāyeti yedi mâhda tetmîm olunup şöyle ki, ʿarzı altı ve ʿumku beş zirâʿ cemʿan on bin zirâʿdan mütecâviz bir hendek hafr olunup, etrâfı şeranpolar ile ihâta ve dâhil ü hâric maʿlûm olmak içün cihât-ı sitte iʿtibârıyle altı ʿaded kapu taʿlîk u inâta olunduğundan başka, mustahfızlar taʿyîn ve birkaç tabya binâ ve toplar taʿbiyesiyle gereği gibi tahsîn ve nümûne-nümây-ı kalʿa-i gevher-nigîn kılındı.