Makāk Sahrâsı'nda hayme-nişîn olanlar, nazm: Ez-ʿamel ʿâlem-i pür inkılâb Nukre-i hâlis şüde sîmâb-ı âb Katre ki, ez-ebr çekân ber-hevâ Mühre-i billûr şüde der-hevâ me'âliyle giriftâr-ı raʿdet-i berd ve lerzîde-i bürûdet-i mevsim serd olup, te'sîr-i kâfûr-i berf kuvvet-i nâmiyeden ıskāt-ı fiʿl tevlîd ve ʿurûk u şerâyînde mânend-i âb cereyân eden rûh-i hayvânı muʿattal berd-i şedîd olup, nevʿ-i insân cins-i hayvân, nazm: Ditreyüb berk-i hazân gibi serâ-ser ʿâlem Teb-i hummâ sanasın ʿâleme olmuş sârî vefkınce sahrâlarda karârdan ʿâciz ve kesret-i emtâr ise bir çadırdan bir çadıra varmak tarîkını mâniʿ u hâciz ve fîmâ-baʿd bu hâl ile ikāmet itlâf-ı nüfûsa sebeb olacağı maʿlûm-i Sadr-ı vâlâ-neseb olmağla, meştâ husûsiyçün ʿakd-ı cemʿiyyet-i meşveret kı- lınmışidi. Herkes bir tarafı tercîh ve baʿzı ʿukalâ serhadlerden dûr olmağı ʿadem-i tecvîz ile Yanbolu Kasabası'nı tasrîh eylediler. Bu tedbîr karâr-gîr ve Rikâb-ı hümâyûn'dan istîzân ü istirhâs olunup, haber gelinceye dek, Şumnu'da ikāmeti erbâb-ı fark ü temyîz bi'-ittifâk tecvîz etmeleriyle, selh-i Şaʿbân-ı şerîfde meştâya duhûl ve herkes sâl-i güzeştede muʿayyen olan hânesine nüzûl eyledi. Şumnu Kasabası'nın etrâfında vâkiʿ kurâ vü kasabât ehâlîsinin ekserî beliyye-i mâ-selef ile berü taraflara hicret edüp, zehâyir ve ʿalef ve sâyir meʾûnet ü hûrdenî bu sebeble zâyiʿ ü telef olduğundan, her vechile zarûret çekilmek tasavvuru tahdîş-i ezhân etmişiken, fazl-ı Bârî ile Şumnu'ya duhûlden sonra bi'l-fi'l-cümle ehâlî yerlü yerine gelip, mevhum olan muzâyaka indifâʿıyla umûm-i nâs nâyil-i inbisât-ı bî-kıyâs olup, Şumnu Kasabası hısb u rehâ ve vüsʿat-i erzâk u gıdâ ile Mısr-ı sagīr ıtlâkına sezâ ve bu esbâb ile mahall-i mezkûr meştâya tahsîs ve rikâb tarafına [M2 289] ʿarz u telhîs olundu. Silistire Serʿaskeri Vezîr ʿOsmân Paşa Silistire'ye iki sâʿat buʿdu olan bir karyede ve Dağıstânî ʿAlî Paşa Kozluca'da kışlamak üzere taʿyîn-i mekân ve Selânik Mutasarrıfı Vezîr İbrâhîm Paşa'nın hâli perîşân olmak cihetiyle, mansıbı olan Selâniğ'e ʿazîmet üzere meʾzûn olmuşiken, hilâl-i râhda Kandiye Eyâleti ile memnûn kılınup, ʿİzzet Ahmed Paşa dahi Niğbolu'da ârâm ve Yenişehirli Vezîr İsmâʿîl Paşa İnebahtı'ya teveccüh ile tahsîl-i merâm eyledi.