İbtidây-ı cülûslarında, çâr-bâliş-nişîn-i Sadâret-i ʿuzmâ olan Râgıb Mehmed Paşa makāmında ibkā ve altı sene mikdârı mühimmât-ı Sadâret'i icrâdan sonra medhûş-i sekret-i reybe'l-menûn ve Koska'da binâ etdiği Kitâb-hâne hazîresinde medfûn oldu. Yerine Hamza Paşa Sadrıaʿzam olup, bir sene kadar kâr-sâz-ı umûr-i enâm ve baʿde'l-ʿazl Cidde'ye gidüp, ʿArafât'da mütenâvil-i câm-ı himâm oldu. Bundan sonra Mustafa Paşa bir buçuk sene kadar kâfil-i umûr-i Sadâret ve Midilli Cezîresi'nde mahnûkan ʿazm-i semt-i âhıret eyledi. Yetmiş sekiz senesi evâyilinde Muhsin-zâde Mehmed Paşa, Vezîr ve üç sene kadar o makāmda karar-gîr oldukdan sonra maʿzûl ve Silahdâr Hamza Paşa yerine menkūl oldu. Müşârun ileyh yirmi yedi gün muhtellü'ş-şuʿûr, mutesaddî-yi umûr oldukdan sonra ʿazl ve Gelibolu'ya vardıkda vefât ve terk-i dağdağa-i kâyinât eyledi. Bundan sonra Nişancı el-Hâc Mehmed Emîn Paşa Sadr-ı iclâle mütesâʿid ve Sipehsâlârlık şerefiyle umûrunda müstakil [M2 282] ü münferid olup, bâlâda tafsîl olunan esbâb ile ʿazl ve Edirne'ye geldikde, seyf-i kazâ' vü kader ile terk-i ser ve Tevfikī ʿAli Paşa bu mesnede zîb ü fer ve andan sonra Halîl Paşa ve bir sene murûrunda Silahdâr Mehmed Paşa mühr-i hümâyûn ile kâm-revâ olup, Bazarcık'da o dahi maʿzûl ve'l-yevm Sadrıaʿzam ve Serdâr-ı ekrem olan Muhsin-zâde Mehmed Paşa, sâniyen neyl-i Sadâret'le vâsıl-ı ser-menzil-i me'mûl oldu.