Sulb-i pâk-i Şâhâne'lerinden Sultân Selîm nâmında bir Şehzâde-i bî-müdânî el-yevm ârâyişde ser-suffa-i zindegânî olduğundan başka, üç ʿaded selâtîn-i ʿismet-âyîn terkiyle, tahsîl-i ʿömr-i sânî buyurmuşlardır. Ramazânlarda ʿulemâyı fî külli yevm huzûr-i Mülûkâne'lerine getürdüp, Kadı Beyzâvî Tefsîri'nden mübâhase etdirerek, kesb-i feyz-i rûhânî ve istifâde-i nüket-i Furkānî ʿakībinde dersde hâzır olanları nakd-i firâvân ile taltîf ve nevâziş ü iltifât ile teşrîf muhteriât-ı Sultâniyye'lerindendir. Üsküdar'da vâlide-i müşfikalariyçün mükellef bir câmiʿ binâ ve evkāf-ı kesîre rabtıyla hademesini iğinâ buyurduklarından fazla, Lâleli civârında iki minâreli câmiʿ ve medrese ve ʿimâret ve türbe binâsıyla, ism-i sâmîlerin ihyâ ve zelzeleden münhedim olan Ebu'l-feth Sultân Mehmed Hân Câmiʿini müceddeden inşâ ve Yenikapu hâricinde tûlen on iki bin ve ʿarzan altı bin zirâ mahalli imlâ ve niçe dil-güşâ büyût ve dekâkîn binâsıyla, bir mahalle-i cân-bahşâ îcâd buyurmuşlardır. Cenâb-ı Hak mezâr-ı pür-enverlerin mehbit-ı şuʿâ-i rahmet ve mevrid-i vüfûd-i mağfiret eyleye! Âmîn, bi-hurmet-i Seyyidi'l-enbiyâ-i ve'l-mürselîn.