Düşmen Bazarcığ'ı istîlâda nisvân tâyifesinden biri imkân-ı firâr bulamadığından, sakf-ı beytinde ihtıfâ ve düşmen beş on gün derûn-i kasabada kâr-ı bend-i yağma olarak tâkāt ve zevâyây-ı büyûtu teftîş etmişiken, cenâb-ı Hak o muhaddere-i tâhiretü'z-zeyli keyd-i düşmenden masûn edüp, Reʾîs Efendi Bazarcığ'a duhûl etdikde, mezbûre gelüp, ifâde-i hâl ve bir mikdar ʿatıyye ile muʿtemed bir kimseye koşulup, Varna'ya irsâl olundu. O taraflara gereği gibi nizâm ve asker ve sâ'ir cihetler ile muktezây-ı maslahatı itmâmdan sonra meşkûru'l-mesâʿî Ordu-yi hümâyûn'a ʿavd ü insırâf ve Dağıstânî ʿAli Paşa'nın Bazarcık'da ikāmeti husûsunu Sadr-ı mekârim-ittısâf ile bi'l-muhabere tecdîd ü istînâf eyledi. Efendi-yi mûmâ ileyhin hüsn-i tedbîr ve heybet-i ʿâlem-gîrleriyle düşmen Karasu köprüsünü geçüp, verâdan vâfir dil ü kelle ahzıyla kâmrân ve Serʿaskerler temşiyetinden ʿâciz böyle bir hidmete muvaffak olması nezd-i Serdâr-ı ekremî'de sebeb-i mezîd-i istihsân olup, bir sevb-aʿlâ semmûr ile mükerrem ve envâʿ-ı nevâziş ü iltifât ile câme-i zer-târ kadr u rifʿati mutarraz ve muʿallem kılındı.