Düşmen-i mekkâr Tulça ve İsakçı sâhillerini zabt ile Babadağı'ndan Karasu'ya dek yemîn ü yesârını asker ve şenlikden ihlâ ve Bazarcık semtini yağma kasdında olduğu tahkīk-kerde-i erbâb-ı nühâ olup, mehmâ-emken o tarafın takviyesine ihtimâm ve Dağıstânî ʿAli Paşa'ya terk-i rakadet-i gafletle mutabassır bulunması, ber-vech-i tekrâr ifâde vü ifhâm olunmuşidi. Aʿdây-ı bî-dîn asker-i makhûrunu iki kol edüp, bir fırkasını Varna'ya ve bir fırkasını Bazarcığ'a taʿyîn edüp, kasaba-i mezkûre halkı ʿan-asl hücûm-i aʿdâyı tahkīk ve Devlet-i ʿaliyye askerinden ümmîdi katʿ ile celây-ı vatan zımnında birbirini tergīb ü teşvik edüp, fikr-i ʿıyâl dahi, fi'l-hakīka kendülere pâ-bend ü ʿikāl ve düşmenin Bazarcığ'a hücûmundan on sâʿat mukaddem ehâlînin nısf derecesi emvâl ü ʿiyâllerini Varna Kalʿası'na nakl ü idhâl ve nısf-ı âharı Balkān eteklerinde vâkiʿ kurâ vü kasabâta vazʿ-ı rihâl eylediler. Düşmen dahi Bazarcığ'a karîb olup, Serʿasker Paşa maʿiyyetinde mevcûd ve Ordu-yi hümâyûn'a gelen meştâ askerinden tarafına vürûd eden cemʿ-i maʿdûd ile düşmene mukābil olup, Katana ve Kazak ile ceng ü savaş ve vâfir kâfiri katl ü cerh ile giriftâr-ı çâr-mevce-i inkılâb ü telâş eyledikleri hâlde, düşmenin piyâde ve topları verâdan idrâk ve İslâm askeri âteş-i aʿdâdan vehm-nâk olarak Kozluca'ya ʿavdet ve Sadrıaʿzam'a vâkiʿ olan ahvâli tahrîr u işâret eylediler. Serʿasker-i müşârun ileyh Karasu'da top ve cebehâne ve vâfir hıyâm terkiyle reh-girây-ı vâdî-yi inhizâm olup, bahtı birkaç defʿa tecribe vü imtihân ve ʿazl ü te'dîbi musammem-i Sadr-ı zemân iken, şâyed müteferrik olan askeri cemʿ ve o havâlîyi muhafaza [M2 273] eder mülâhazasıyla, dâiresine nizâm ve bâzûy-i iktidârına istihkâm vermişidi. Bu defʿa dahi mukābeleye vâfî başında olan askeri iʿmâle muvaffak olamayup, düşmenden rû-gerdân olduğu erkân-ı Saltanat'a îrâs-ı ye's ü hırmân edüp, bu sebeble otâk-ı Serdâr-ı ekremî'de istişâre ve tîz elden bu derd-i nâgeh-zuhûra erbâb-ı ârâdan çâre taleb olunup, Re'îs Efendi cevâba âgāz ve: “Düşmene fî-mâ baʿd haylûlet eder bir şey olmayup, doğru ordu üzerine gelmek ihtimalden baʿîd olmamağla, şimdiden muhârebeye münâsib bir mahal tahsîsi ile Ordu-yi hümâyûn'un tahrîki her cihetle, münâsib-i vakt ü hâl mülâhaza ve istısvâb olunduğu takdîrde bu kulları etbâʿ ve levâhıkımla Yeni-bazar'a ʿazîmet edüp, Karasu ve Bazarcığ'dan müteşerrid olan cünûd-i İslâmiyye'yi cemʿ ve düşmen üzerine havâle ile dîn ü devlet uğrunda fedây-ı ser ü cân ederim” dedikde, Sadrıaʿzam bu tedbîri tahsîn ve huzzâr-ı meclis: “Sellemekallâhü” âvâzesiyle îfây-ı şart-ı pesend ü âferîn eylediler. Efendi-yi mûmâ ileyh tekmîl-i levâzım u âlât ve cemʿ-i müteferrikāt ʿakabinde üç beş yüz âdem ile Yeni-bazar'a doğru feth-i şukka-i râyât eyledikden sonra, Şumnu'ya yarım sâʿat olan Makāk Sahrâsı'na Ordu-yi hümâyûn nakl olunup, ahmâl ü eskālden ʿârî olarak âmâde-i muhârebe vü mukāraʿa ve düşmen üzerine gitmek âvâzesi işâʿa olundu.