Ordu-yi hümâyûn hazînesinde kıllet-i mebâliğ ile mesârıf-ı zarûriyyede me'mûrlar giriftâr-ı kayd-ı metâʿib oldukları maʿlûm-i Şehriyâr-ı İskender-menâkıb olmağla, bu defʿa dahi beş yüz kîse hazîne-i hümâyûndan ifrâz ve Ordu-yi hümâyûn'a resîde ve erbâb-ı istîfâ refâh-ı fi'l-cümle ile ârâmîde oldular. Serʿasker-i sâbık Nuʿmân Paşa Kulle'de ikāmete me'mûr iken, Misivri muhâfazasına nakl ve Rumeli Eyâleti, Silistire Serʿaskeri ʿOsmân Paşa'ya vasl olunup, Bosna Eyâleti, Karasu Serʿaskeri nasb olunan Dağıstânî ʿAli Paşa'ya ihsân ve Özi Eyâleti ile Silistire Muhâfızı es-Seyyid Hasan Paşa ferhân kılındı. Zikr olunan beş yüz kîseyi müteʿâkıb bin elli kîse dahi vârid olup, bir kıst mevâcib tevzîʿ ve tavâyif-i askerînin devâyir-i maʿîşetleri tevsîʿ olundu.