İki mevsimin askeri tarden ve ʿaksen tertîb ü âmâde kılınmak kâr-ı kadîm olduğuna binâ'en, sayf hılâlında her tarafdan meştâ askeri tahrîr ve mukaddem mübâşirler ile evâmir-i ʿaliyye tesyîr olunmuşidi. Vakt ü zemânıyla asâkir-i mezkûre fevc fevc Ordu-yi hümâyûn'a vâsıl ve serhadlere ve sâyir lüzûmu olan mahallere taksîm ile bâ-fazl-ı Hak her cânibde min ciheti'l-asker kuvvet ü metânet hâsıl oldu. İhtiyâta riʿâyet ve tâyife-i askerîyi iʿmâl ile me'lûf-i râhat etmemek matlûb-i Sadr-ı ser-efrâz ve bu niyyet ile meştâ askerinden dört bin beş yüz nefer ifrâz ve müceddeden hafr ve inşâ olunan meterisler etrafına taʿyîn olunarak, âzmâyiş-i semt-i harb ü peygâr kılındığından başka, beş yüz nefer süvârî dahi leylen ve nehâran ber-vech-i münâvebe ikişer üçer sâʿat buʿd ile pîrâmen-i Ordu-yi hümâyûn'da geşt ü güzâr eylemeleri tenbîh olundu. Dergâh-ı ʿâlî kapucu-başılarından Filibeli ʿIvâz Mehmed Ağa, evâsıt-ı eylülde beş yüz nefer ile alay gösterüp, pîşgâh-ı Sadâret-penâhî'den güzer ve ilbâs-ı hılʿat ile muvakkar olunmuşidi. Mevcûd-i maʿiyyeti olan neferâtın ʿaynen yâhûd bedelen taʿyînâtları teklif olundukda, ʿadem-i kabûl ve müddet-i ikāmetinde o mikdâr askeri malından idâreye taʿahhüdü mecbûl olduğu sadâkati te'yîd etdiğinden, cümle ʿindinde muʿteber ü makbûl oldu.