Cânib-i mezkûr Serʿaskeri olan Seyyid Nuʿmân Paşa'nın Kaynarca Vakʿası'ndan sonra telâfî-yi mâ-fât ile sebeb olduğu cerîhayı iltiyâm, lâzim-i ʿuhde-i diyâneti iken, bî-hûde ifâte-i evkāt ve ne hâl ise, Hırsova'yi yed-i aʿdâdan nezʿ içün dalkılıçlar ile birkaç bin âdem taʿyîn edüp, hâlden gāfil ve kalʿayı metânetden ʿâtıl mülâhaza eden asker Hırsova'ya hücûm ve baʿzı tabyaları zabt hılâlinde düşmen-i dîn zevâyây-ı kalʿada der-kemîn olup, her cânibe hendese ile tertîb etdikleri toplara âteş vererek, giyâh-ı hûd-reste gibi her tarafdan nümâyân ve cünûd-i İslâmiyye'yi ihâta vü istîʿâba şitâbân oldular. Asker-i İslâmʿda topun kılleti ve düşmenin ʿadem-i vefreti zannıyla, ber-vech-i kemâl esbâb-ı muhârebenin fıkdânı sebeb-i perîşânî olup, cünûd-i muvahhidînin vâfiri şehîd ve bakıyyeleri tahlîs-i nefs ile mahall-i maʿrekeden baʿîd ve Karasu'ya vusullerinde: “Nusrat ü hezîmet mevkūf-i meşiyyetdir” deyerek, temhîr-i evrâk ile dalkılıç bakıyyelerini mazhar-ı işfâk etmek ve sâyirlerine dahi istimâlet ü nevâziş muʿâmelesi takdîm olunmak lâzım iken, müşârun ileyh ʿunf ile askerîyi mes'ûl ve baʿzısına seyf-i kahr ü cerebi meslûl eylediğinden, cümlesi Karasu'yu terk ve Bazarcığ'a vusûl buldular. Bu keyfiyyet Bazarcık'da olan Çavuş-başı Ağa'ya maʿlûm oldukda, müteşerrid ü müteferrik olanları ve maʿiyyetinde olan dalkılıç ve sâyir askeri cemʿ u ihtifâl ve Bazarcık muhâfazasında olan Anadolu Vâlîsi'ni dahi alup, Karasu ordusuna neşr-i bâl-i istiʿcâl eylediler. Müşârun ileyhin mahall-i mezkûrdan ʿadem-i hareketi fi'l-hakīka askerin rucûʿuna ʿillet olduysa dahi, nüfûz u iʿtibârına halel târî ve bi-hikmetillâhi Teʿâlâ birkaç defʿa ordusuna ve me'mûr etdiği askere hezîmet vukūʿu sebebi ile beyne'n-nâs şe'âmet-i kadem ile iştihârı ve ʿale'l-husûs ʿillet-i samem, ʿazline ʿilleti-i etem olup, recebül-ferdin yirmi altıncı günü maʿzûl ve Hacıköyü'nde mukīm Dağıstânî ʿAli Paşa Serʿaskerlik menziline mevsûl oldu. [M2 270]