Silistire Vakʿası'nda münhezim olan düşmeni taʿkīb, asker-i İslâm'ın birkaç günden berü meşgūl-i mükâfehe olarak, kemâl-i taʿb ü meşakkatleri mülâhaza olunarak tasvîb olunmayup, küffâr dahi üç fırkaya münkasem ve bir kısmı mecrûhlarını karşuya imrâr ve bir kısmı Kaynarca üzerinden Babadağı'na doğru gidüp ve bir fırkası dahi ekser mahalli müşrif-i harâb olan Hırsova'ya tehassun ve fi'l-cümle taʿmîr ile derûnunda temekkün etmişler idi. Küffârın bundan sonra Bazarcık semtlerine kasd ü niyyet-i fâsideleri mücerreb olan hâllerinden maʿlûm ve Serʿasker Nuʿmân Paşa'nın yârây-i mukāvemeti maʿdûm olduğu dahi meczûm olduğundan, askeri iʿmâl ve müşârun ileyhe îrâs-ı kuvvet-i bâl etmek mülâhazasıyla, o havâlî askeri re'yine râm olan Dîvân-ı hümâyûn Çavuş-başısı el-Hâc İspir Ağa'nın maʿan Karasu'ya me'mûriyyeti istisvâb olunup, Kaynarca'da dest-i aʿdâya resîde olan top ve mühimmât bedeli dahi Ordu-yi hümâyûn'dan tertîb ve ol tarafa tesrîb olundu. Ordu-yi hümâyûn'da bulunan askerin ekserîsi zî-kudret ve hîn-i hâcetde sebâtlarına iʿtimâd olunmayacak asker olup, dalkılıç yazılanlar oldukça müretteb ve hidmetleri edâsına dek me'mûr oldukları mahalde sebât ve istikrarları mücerreb olmağla, bir mâh mukaddem bir mikdâr dalkılıç tahrîri Yeniçeri Ağası'na [M2 269] fermân ve oldahi iki bin kadar şücʿânı tahrîr u âmâde eylediğini Sadr-ı kerem-muʿtâda ifâde vü beyân etmişidi. Kaynarca'da olan dalkılıçların dahi baʿzısı orduya vürûd ve cemʿiyyetleri üç bine karîb olup, bunlar dahi Karasu ordusuna taʿyîn ile esbâb-ı zâhirenin istikmâline sarf-ı mechûd kılındı.