Bir müddetden berü Ak-deniz adaları etrâfında geşt ü güzâr ve sefâyin-i tüccâr ve cezâyir halkına îrâs-ı hasâr eden Orlof nâm merd-i gaşûm Bodrum üzerine hücûm ve o havâlî muhâfazasına me'mûr olanlara kazıyye maʿlûm oldukda, emr-i müdâfaʿaya ber-zede-i dâmân-ı ihtimâm ve mesfûru o sâhilden tard ile nâm-yâfte-i enâm olmuşlar idi. Laʿîn-i mesfûr asker ve sefînelerini tertîb ve askerden hâli zan etdiği İstanköy Cezîresi'ne birkaç bin asker döküp, mütesadî-yi yağma vü tahrîb oldukları meşhûd-i ehâlî oldukda, hemân bir mahalle ihtişâd ve cenâb-ı Hak'dan istimdâd ile [M2 268] aʿdây-ı dîn üzerine mânend-i seylâb cereyân ve tîg-i âteş-tâbların ʿuryân eyleyerek, sekiz sâʿat kadar düşmene darb-ı tîg-i mîg-reng ve emtâr-ı dâne-i tüfeng edüp, düşmen bu hücûm-ı dilîrâneden dil-teng olarak münkesir ü perîşân sefînelerine gürîzân ve bir mikdârı mîşezâr içinde muhtefî vü pinhân oldular. Hîn-i maʿrekede düşmen-i dînden beş bin kadar müşrik hâlik ve yedi kıtʿa top ve yüz kantar barut ve vâfir mühimmâta guzât-ı zafer-simât mâlik olup, bu gazây-ı ʿazîmde hidmeti meşhûd olan ʿAbdurrahman Ağa'ya ve Bodrum Vak'ası'nda isbât-ı vücûd eden Cihân-zâde Mustafa Ağa'ya Kapucu-başılık ihsân olunup, Ordu-yi hümâyûn halkını tefrîh içün Kapudân Paşa tarafından vürûd eden beşâretnâme taraf-ı vâzıhu'ş-şeref-i hazret-i Tâcdârî'den taraf-ı Sadru's-sudûr'a irsâl olunup, hâvî olduğu beşâret kulûb-i nâsa ilkāy-ı sunûf-i beşâşet ve darb-ı tabl u top ile bu haber-i meserret-eser efrâd-ı nâsa işâʿat olundu.