Dergâh-ı ʿâlî kapucu-başılarından Ruscuk Aʿyânı es-Seyyid Hasan Ağa bundan akdem Ordu-yi hümâyûn'a ihzâr ve Ruscuk'da bî-hadd asker ictimâʿ etmişiken, Yergöğü tahlîsının bu âna dek ʿukde-i te'hîre giriftâr olmasının sebebi istifsâr olunmuşidi. Bâlâda işâret olunduğu vech üzere Serʿaskerliğe kendüsü tâlib ve sarâhaten beyandan hârib olarak, tabîʿatıyla zuhûr eder ihtimâline zâhib olarak, Serʿasker bulunan Dağıstânî ʿAli Paşa ile askerî tâ'ifesinin ʿadem-i imtizâcını îmâ ve garaz ne olduğu maʿlûm-i erbâb-ı nühâ olup, hadâset-i sin ve ʿadem-i tecribe ile hakkında bu hatb-ı cesîm sezâ görülmeyüp, Vezîr İsmâʿîl Paşa Serʿaskerlik ile o tarafa baʿs ü isrâ olunmuşidi. Mûmâ ileyhin birâderi Mehmed Efendi orduya gelüp, bu mâddeyi gâh tasrîh gâh izmâr ve: “Âkıbet birâderime rütbe-i Vezâret sezâ-vâr görülür ise, Yergöğü Kalʿası'nın fethini teʿahhüd ederiz" dedikde, bu sûret mülâyim-tıbâʿ-ı kâr-şinâsân-ı rüzgâr olup, yevm-i mezkûrda mûmâ ileyhe rütbe-i vâlây-ı Vezâret ihsân ve Ruscuk Muhâfızı ʿunvânıyla fâyiku'l-akrân kılındı.