Anadolu Vâlîsi Vezîr ʿÖmer Paşa bundan akdem sevk-i asâkire me'mûr ve ihrâc etdiği cünûdu fevc fevc Ordu-yi hümâyûn'a tesyîr ile bezl-i vüsʿ ve sarf-ı makdûr etmişidi. Bu hidmeti ikmâl ve bi-hasebi'l-me'mûriyye kendü dahi bizzât Muʿasker-i hümâyûn'a neşr-i bâl-i istiʿcâl eyleyüp, cumâdelûlânın yirmi sekizinci günü Ordu-yi hümâyûn'a resîde ve nazar-gâh-ı Âsafî'den mürûr ile alayı pesendîde olup, emsâline kıyâsen serâ-sere dûhte bir sevb-i semmûr dûş-i iftihârına iksâ ve hılâl-i râhda vukūʿ bulan teʿaddîsinden bi-hasebi'l-iktizâ iğzâ olunmuşidi. Düşmenin Karasu ordusuna hücûmu beyne'n-nâs vâsıl-ı derece-i şöhret ve o taraf Serʿaskeri Nuʿmân Paşa'da Kaynarca Vakʿası sebebi ile kudret kalmayup, kalsa dahi fî-mâ baʿd yedinden bir hidmet zuhûra gelmeyeceği meczûm-i erkân-ı devlet olmağla, şimdilik Hacı-oğlu Pazarı tarafına Vezîr ʿÖmer Paşa'nın hareketi savâb-dîd-i erbâb-ı bîniş ü dîd ve işbu cumâdelâhirede ol-savba rişte-i ʿazîmeti temdîd [M2 267] eyledi. Şâm Vâlîsi Vezîr Hâfız Mustafa Paşa min-ciheti'l-vücûh ferbih ü semîn ve tâbiş-i Hicâz'a kudret-yâb olamadığını ʿarza-dâşt-ı südde-i ebed-karîn olmağla, Karaman Vâlîsi ʿAzm-zâde Vezîr Mehmed Paşa ile mansıbları mübâdele ve Van Eyâleti Vezîr Dâmâd Hüseyin Paşa'ya ihâle olunup, Sipâhîler Ağası iken vefât eden Aydoslu Hasan Ağa'nın mansıbı olan Sipâhîler Ağalığı Ziştovili Halîl Ağa'ya tevcîh ü ihsân ve neyyir-i bahtı firûzân kılındı.