Vidin Muhâfızı Vezîr Ahmed Paşa'dan [M2 266] fî'l-asl yararlık meşhûd olduğundan, mazhar-ı cûd-i Şehriyâr-ı ʿâlem-sûd olup, Rikâb tarafından yüz elli ve ordu tarafından elli kîse ihsân ve Serʿaskerlik ile refîʿu'ş-şân kılınup, maʿiyyetinde ihtişâd eden asker ile Kalafat tarafına geçüp, andan Kulle'ye ʿazîmet ve Niğbolu'dan vürûd edecek askeri isticlâb ile Ruscuk Serʿaskeri Yergöğü tarafına hücûm edeceği vakitde kendü dahi hareket ve bi'l-ittifâk istıhlâs-ı kalʿaya himmet etmek üzere me'mûr ve tarafına hitâben müteʿaddid evâmir-i celîle şeref-rîz-i sudûr olmuşidi. Müşârun ileyh ber-minvâl-i muharrer kalʿaya gelüp, Niğbolu'da müctemiʿ olan asker dahi maʿiyyetine vürûd ve levâzım-ı sâyiresin ikmâl ʿakabinde Yergöğü'de isbât-ı vücûd etmek kasdında iken, aʿdânın kalʿaya hücûmu beyne'l-asker şâyiʿ ve harekete mâniʿ olup, meteris hafrıyla cenge hâzır ve birkaç defʿa zuhûr eden düşmen ile muhârebeye müsâbir olup, bu sûret Yergöğü tarafına kasd ve ʿazîmetini ilgā ve mukîm olduğu mahalli muhâfaza ile iktifâ eyledi. Silistire'de vukūʿ bulan gazây-ı ekber mûcib-i inbısât-ı Pâdişâh-ı İskender-fer olduğuna binâʾen, Sadrıaʿzam'ı taltîf ve şevk-i mücâhidîni tazʿîf irâdesiyle, mufassal ü meşrûh bir kıtʿa hatt-ı hümâyûn ısdâr ve Serdâr-ı ekrem'i iki esb murassaʿ raht ile hâyiz-i rehîne-i iftihâr buyurdular.