Müşârun ileyhin zabt u rabt-ı neferâtda fütûru ve ʿakl ü zekâda kusûru olmayup, bîm ü satvetinden haşerât-ı neferât tersân ve niçe gerden-keşân tavk-ı itâʿatı ikāme-i bürhân ʿakabinde seyf-i kâtıʿ-ı siyâsetle bî-ser ü sâmân edüp, piyâdenin her sınıfını ıslâh ve ehl-i ʿirz ve mü'eddiblerinin matlablarını incâh ve bu mülâbese ile ʿazlini mûcib bir hâl yoğiken, mücerred Kul Kethudâsı Yeğen Ağa'nın Silistire cenginde zuhûr eden yararlığına mükâfât zımnında ibrâm-ı etrâf ile cumâdelûlânın on altıncı günü ʿazl ve Kapu Kethudâsı mûmâ ileyh yerine vasl olundu. Müşârun ileyhe sûret-i zâhirede Rumeli Eyâleti tasmîm ve Bazarcığ'a ʿazîmeti tefhîm ve bu keyfiyyet müşârun ileyhi sakîm edüp, ilbâs-ı hılʿate daʿvet olundukda, bir iki gün temâruz izhâr ve Sırrı Selîm Efendi vesâtatıyle Kandiye mansıbını tahsîl ile mest-i rahîk-i istibşâr olup, Boğaz Serʿaskeri Vezîr Kapudân Paşa'nın orduya me'mûriyyeti lâzım gelmekle, Rikâb-ı hümâyûn tarafından Boğaz muhâfazasına taʿyîn ve çok geçmeden Anadolu'dan asker sürmek me'mûriyyeti inkılâbât-ı derûnunu teskîn eyledi.