Sadrıaʿzam ve Serdâr-ı ekrem hazretleri hufyeten Çelebî-zâde Mehmed Efendi'yi ve Hasan Ağa'yı Ruscuk'dan getürdüp o tarafda fevka'l-had asker ictimâʿ ve Devlet-i ʿaliyye yevmiyye katʿî çok mesârıfa ibtilâ ile bu âna dek kalʿanın ʿadem-i istıhlâs ve intizâʿına sebeb ne olduğun su'âl ve anlar dahi: “Serʿasker Paşa'nın tevâyif-i askeriyle imtizâcı olmadığından neş'et eylediğini ifâde ve ʿazl ve âharı nasb olunursa ʿumûmen o tarafa geçüp, [M2 265] fazl-ı Müteʿâl ile tahlîs-i kalʿaya saʿy bî-hemâl olunur” deyü bast-ı makāl ve bundan garazları Hasan Ağa'nın rütbe-i Vezâret ile Ruscuk Serʿaskeri olmasını işrâb ve Devlet dahi bu mâddede ihtiyâr-ı semt-i tecâhül ve mâddeyi zâhirine haml ile Ruscuk Serʿaskeri Dağıstânî ʿAlî Paşa'yı ʿazl ve Mertin [Marten] muhâfazasına taʿyîn ve Yenişehirli İsmâʿîl Paşa o taraf Serʿaskerliği ile kâm-bîn kılındı. Müşârun ileyh Mertin'e [Marten] geldikden sonra Ordu-yi hümâyûn çarhacısı nasb olunup, muktezây-ı me'mûriyyeti üzere Muʿasker-i Sultânî'ye vâsıl ve Sadrıaʿzam pîşgâhından alay gösterüp, intizâm-ı dâyiresinden mahzûziyyet hâsıl olup, civâr-ı Ordu-yi hümâyûn'da taʿyîn-i mahal ve birkaç günden sonra Nu'mân Paşa'nın evzâʿ-ı nâ-bercâsı imlây-ı mesâmiʿ-i nâs ve o taraflarda ikāmeti sebeb-i tevellüd-i mahzûr u be's olduğu ihsâs olunmağla, ʿAlî Paşa'nın o taraflarda bulunması istihsân ve maʿiyyetine top ve asker verilüp, Karasu'ya karîb Hacı Köyü'nde ikāmetle, her tarafa havâle-i gûş-i izʿân kılması bâbında tarafına tenbîh ü fermân olundu.