Rusya Feld Merşali Romançof Silistire üzerine hareketi hilâlında müteferrik olan askerini [M2 264] başına cemʿ edüp, İsmâʿîl cânibinde olan Nemçelü Wissmân nâm Cenerali dahi bu cemʿiyyete daʿvet ve ber-minvâl-i muharrer hey'et-i pür-haybetlerine tetarruk eden tezelzül ve hezîmet iktizâsıyla, Ceneral-i mesfûr müfârekat ve İsmâʿîl'e gider iken, Kaynarca'da Nuʿmân Paşa ordusuna musâdefet ile zarûrî cenge mübâşeret etmişler idi. Nuʿmân Paşa'nın maʿiyyetinde olan asker yirmi bine karîb ve bu cümlenin altı bin mikdârı dalkılıç olup, haylî zûrmend ve düşmenden rû-tâb olmayacakları bî-irtiyâb iken, küffâr meterislere karîb gelmedikçe bir kimsenin haberi olmayup, ne talîʿa vü dümdâr ve ne yemîn ü yesâr ve belki kemâl-i gaflet ile cümlesi ser-germ-i câm-ı tesalluf ü pindâr olup, düşmen-i-nâ-gâh zuhûrdan cümlesi bî-şuʿûr ve ne hâl ise, tetmîm-i kusûr ile cenge ibtidâr ve dalkılıçlar sabr edemeyüp, düşmen ile miyâneleri yarım sâʿatlik mahal iken, yürüyüşe ictisâr ve ceng mahalline varır varmaz ekserîsine intifâh ʿârız ve düşmen dahi bir yaylım âteş verüp, cümlesini mecbûr-i firâr eyledi. Serʿasker Paşa ʿillet-i samem iktizâsıyla, neden sonra keyfiyyete vukūf ile terk-i bâr u büngâh ve Bazarcığ'a doğru hezîmet ile iktirâf-ı maʿsiyyet ü günâh eyledi. Taraf-ı İslâmiyân'dan ibtidâ vâkiʿ olan hamlede Ceneral Wissman hâlik ve helâki kimseye ifşâ olunmayarak, ber-muktezây-ı tertîb-i cedîd herkes kendü tarafında vâkiʿ olan maslahatın rü'yetini tâlib ve mürîd olarak bozgun u singin (صنغن) asker-i müşârun ileyhin ordusuna bi'l-külliyye mâlik olduğundan, işindenler müşârun ileyhi hedef-i tîr-i nefrîn ü melâm ve nişâne-i taʿna-i cerb ü düşnâm eylediler. Müşârun ileyh taraf-ı Serdâr-ı ekremî'den hezâr tevbîh u âzâr ile Karasu tarafına tahrîk ve o havâlîde olan aʿdânın defʿ-i mazarratı zımnında gûş-i intibâhı taʿrîk olundu.