Rusya Merşali bâlâda mesbûku'z-zikr galebe ile mesrûr u mest-bâde-i gurūr olup, Silistire'yi tahlîs zımnında cenerallerinin meşâhirlerinden Potemki ve Wissmân dedikleri bed-ahterler ile bi'n-nefs kendüsü bî-hadd ü kıyâs kefere ile hareket [M2 261] ve hendekleri imlâ vü teşhîn fikr-i fâsidiyle beş yüz ‘araba çıbuk ve vâfir yağlı paçavra tedârü küyle hasr u tazyîk-i kal‘aya mübâşeret ve yetmiş kadar top ve hâven ve yürüyüşde istiʻmâl olunur Puşki Skiliti yanî esrâr topu nâmıyla miyânelerinde müstetir olan beş kıtʿa top ki, ağzı kebîr hâven gibi vâsiʿ ve kaddi kasîr, âl çûka pûşîdeli bir garîb toplar idi. Cümlesini Silistire üzerine havâle ile şehre ‘azîm ıztırâb verdiler. Mâh-ı mezbûrun sekizinci salı günü ‘ale's-seher Merşal-i mesfûr askerini beş kısma taksîm ve taburlarını tertîb ü tanzîm ve cevânib-i şehri ihâta ve mesfûrların zararını imâta zımnında süvâriyân-ı İslâm'ın baʿzıları hâric-i sûrda mutârada ile bed'-i muhârebe vü mücâlede ve düşmen bir fitîlden top ve tüfenge ateş verüp, âheste âheste meterisler üzerine ikdâm ve cünûd-i İslâm dahi mukābeleye hasr-ı sâk-ı ihtimâm eyleyüp, küffâr kurşun menziline geldikde, Serʻasker Paşa ve Çavuş-başı İspir Ağa ve Kul Kethudâsı asker-i zafer-rehberi teşvîk u igrâ ve mesûbât-ı gazâ vü cihâdı bi-etrâfihâ beyân ü imlâ ile dîn-i hamiyyetlerin iğlâ eylediler. Nasîhatleri kulûb-i cünûd-i müslimîne te'sîr ve her birini bîşe-zâr-ı şecâʻatde terbiye olunmuş bir nerre-şîr edüp, hemân düşmen saflarına muhâceme ve altı sâʻat kadar o gürûh-i mekrûha müzâhame vererek, kati çok kâfiri âguşte-i hûn-i bakkam-gûn ve vâfirini zahm-i seyf ile zâr u zebûn eylediler. Ancak düşmenin kesreti ve birkaç defʿa asker-i İslâm'ın muhârebesini tecribe ve 'adem-i sebâtlarını cezm derecesinde tahkīk medâr-ı kuvveti olup, askerini cebr ü ikrâh ile meterislere sevk ve cünûd-i muvahhidîn meterislerde ikāmetden muztar olarak cümlesi varoşa duhûl ve defʿ-i sâyile meşgül oldular. İki sâʻat istirahatden sonra varoşda mevcûd altı bin kadar piyâdeyi ru'esây-ı asker dalkılıç tahrîriyle müştağil oldukları hâlde, düşmen gülle ve humbara ile izʻâc ve tazyîkden hâlî olmayup, ru’esâ: “Vaktimiz bunları tahrîr ile izaʻa olunmak lâzım gelürse, düşmen her tarafdan hücûm ile maʻâzallah şehre fursat-yâb-ı duhûl olacağı zâhirdir. Bu sûretde cümlesi dalkılıç olmak üzere münâdîler nidâ etdirmek evlâdır” demeleriyle ol-vechile nidâ ve herkes bu imtiyâzı ısgā ve sekiz bin piyâde ve beş yüz süvârî hemân kemer-i gayreti miyâne-bend [M2 262] ve birbiriyle ‘ahd ü peyvend ederek, varoş kapuların küşâd ve Kul Kethudâsı pîşvâ olarak sufûf-i aʻdâya karışup, mutesaddî-yi nizâl ü tırâd oldular. Düşmen-i dîn bu cesâreti müşâhede ile san'at-ı nâriyede olan mümâresetini kemâl-i cehd ile izhâr ve her tarafdan şerer-bâr oldular ise dahi guzât-ı zafer-simât katʻâ meyl-i havf ü vecel ve izhâr-ı ihcâm ü feşel etmeyüp, Hak ‘azze ve cel hazretlerine tevekkül ve rûhâniyyet-i Sâlâr-ı enbiya'ya tevessül ile darb-ı şemşîr ve i‘mâl-i neyyire vü tîr ve dört sâʻat kadar nâr-ı mûkide-i ceng-i şerer-efşân ve niçeler terk-i ser ü cân ve zahm-i mühlik ile bî-tâb ü tüvân oldular. vân olup, sebât-ı Müslimîn sebeb-i nasr-ı mübîn ve bâʿis-i teşettüt-i aʿdây-ı dîn olup, karârları firâra mübeddel ve istidrâcları zevâle muhavvel olarak; nazm: Ve dâkati'l-arzu hattâ sâra hâribühüm, İzâ ra'â gayre şeyin zannehü raculen mâ-sadakıyla makhûr u müzellel oldular. Bir sâʿat mahalle dek kutelây-ı küffâr ile sahrâ memlû ve dimâ-i fâsideleriyle arz-ı kafrâ mânend-i cev olup, küştegân-ı müşrikîn sekiz bine ve mecrûhları bine bâliğ olduğu vâsıl-ı derece-i yakīn oldu. On iki kıtʿa top edevâtıyla taraf-ı İslâmiyân'dan iğtinâm düşmen dahi bu inhizâm-ı fâhiş ile berü taraflarda tevakkufdan ʿâciz olup, karşu tarafa mürûr ile dağ-ber-dil-i ekdâr ü âlâm oldu. Düşmenin kuvvetine nazaran şu kadar nüfûs-i İslâmiyye Silistire'de mahsûr u mahbûs ve necâtlarından Serdâr-ı ekrem nevmîd ü me'yûs iken, nâ-gâh haber-i zafer Ordu-yi hümâyûn'a vürûd ve gubâr-ı endîşe ile maʿkūd olan kulûb-i Müslimîn'de suver-i şâdumânî rû-nümûd olup, tebâşîr-i sabâhu'l-ʿîd gibi herkes hisse-yâb-ı sürûr ve şükürgüzâr-ı cenâb-ı Rabb-i Gafûr oldular.