Karasu ordusunun tanzîmi ile iştigāl esnâsında Silistire'ye altı sâʿat mesâfede vâkiʿ Balya Boğazı'na aʿdâ geçüp, etrafa münteşir olan kefereyi isticlâb ve sagr-i mezkûrda muhâfazaya meʾmûr Caʿfer Paşa ve Mustafa Paşa'nın cemʿiyyetlerini tefrîk eylediklerini Serʿasker ʿOsmân Paşa tahkīk edüp, ordusunda ihtişâd ve sebât ü metânetlerine iʿtimâd etdiği süvârîleri çarhaya taʿyîn ile kazıyyeyi Sadr-ı güzîne tahrîr ve istimdâd eylediğinden gayri, Silistire Muhâfızı Vezîr Hasan Paşa'nın bir kıtʿa kāyimesi gelüp, düşmenin vazʿ u hareketinden ibtidâ Serʿasker ordusunu perâkende etdikden sonra, Silistire'yi muhâsara etmek emâresi hiss olunup: “Bir ân akdem Silistire'ye imdâd ve irsâl-ı mühimmât ü ecnâd ile işbu serhadd-i ʿazîmi mahfûz-i gezend-i hasm-ı [M2 258] bed-nihâd eyleyesüz” deyü refʿ-i ʿakīre-i feryâd eylediğine binâʾen, ittifâk-ı ârâ ile yirmi ortaya Kul Kethudâsı Yeğen Ağa Serdâr ve ricâl dâyirelerinde olan tüfengçiler ve iki yüz kadar Enderûn ağaları, Çavuş-başı Ağa ile Silistire tarafına tesyâr kılınup, Ordu-yı hümâyûn çarhacısı Vezîr İbrâhîm Paşa, ordusundan dahi bir mikdâr âdem terfîk ve iktizâ eden zahîreleri husûsunda ber-vech-i kemâl tedkīk olunup, bu sûretle Serʿasker ʿOsmân Paşa'nın ordusuna istihkâm ve heyʾet-i ictimâʿiyyesine nizâm verileceği hengâm, Rusya Mareşali Romançof evvelce davranup, asker ictimâʿından mukaddem maslahat görmek ve iki askeri bir yere getürmemek garazına mebnî Balya'dan tahrîk-i pây-ı şûm ve Serʿasker Paşa ordusuna hücûm eyledi. Ehl-i İslâm çarhacıları küffârın katanasıyla âgāz-ı harb eyledikleri, müşârun ileyhin maʿlûmu oldukda, piyâdeyi mukaddem hafr ve âmâde etdiği meterislere taʿbiye ve vakti hulûl etmeden yürüyüş fikrinde olmamalarını tavsiye edüp, bakıyye-i süvâriyân ile bi'n-nefs maʿreke yerine şitâb ve tâ'ife-i askerîyi igrâ vü tahrîz ile dört sâʿat kadar âteş-i ceng iltihâb ve iki bin kadar küffâr sûhte-i seyf-i âteş-bâr olup, nesîm-i fevz ü zafer mir’ât-ı vukūʿda cilve-ger olacağı zemân, sağ kolda bulunan Deli-orman nâ-bekârları ʿıyâl ü evlâdlarını muhâfaza zımnında cân-nisâr ve meydân-ı maʿrekede cümleden ziyâde pâ-ber-cây-ı merkez-i istikrâr olacağları melhûz iken, zaʿf-ı diyânet ve ʿadem-i gayretle irtikâb-ı ʿâr-ı firâr ve bu hâlet sâyirin tezelzül-i ikdâmına vesîle olup, anlar dahi meterisler cânibine ilgār edüp, meterisde olanlar bu sûreti müşâhede ile firârîlere tâbiʿ ve kıyâsdan bîrûn mühimmât ve edevât-ı ceng bu takrîb telef-şüde ve zâyiʿ olup, Serʿasker Paşa ve piyâdegân ve baʿzı süvâri Silistire'ye duhûl ve hıfz-ı kalʿa ile meşgûl oldular. Düşmen-i dîn ehl-i İslâm meterislerin zabt eylediği gün Ordu-yi hümâyûn'dan pür-sâz ü seleb muntazam u müretteb olan cuyûş-i âhen-pûş dahi Silistire kurbuna vâsıl ve bir mikdârı şehir kurbunda vâkiʿ Küçük Mustafa Köşkü'nde tevakkuf ve bir mikdârı Silistire'ye duhûl ile ehâlîye medâr-ı defʿ-i tehavvüf oldular. Çerhacı Vezîr İbrâhîm Paşa dahi mahall-i mezkûre gelüp, Serʿasker Paşa ile mülâkāt ve hafr-ı meteris ve sâyir istihkâm ile te'diye-i esbâb-ı sebât üzere iken, rebîʿulâhırın [M2 259] üçüncü günü küffâr-ı tebehkâr hadden bîrûn ve kıyâsdan efzûn süvârî vü piyâde ve mükemmel top ve humbara ve sâyir edevât-ı nâriye ve âlât-ı kalʿa-gîrî ile Silistire'yi muhâsaraya niyyet ve cünûd-i İslâmiyye dahi kasr-ı mezbûr pîşgâhında hafr etdikleri meterislere girüp, bi-hulûsi'l-kalb mukābeleye tavtîn-i nefs ve izhâr-ı gayret etmişler idi. Çarhacı İbrâhîm Paşa sekiz bin kadar süvârî ve birkaç nefer Mîr-i mîrân ile bir iki sâʿat ilerüde düşmen askerine hecme-endâz ve muhârebeye âgāz ile meterislere düşmen-i dîni celb etmek fikrinde iken, müşârun ileyhin ihcâmını sunûf-i cünûd firâra haml ile her biri bir semte gürîzân ve düşmen atlusu süvâriyân-ı İslâm'ı taʿkīb edüp, piyâdeleri meterislere doğru yürüyüp, her tarafdan âteş-efşân oldular. Guzât-ı zafer-encâm eğerçi hasmın hücûmundan müte'essir olmayup, mümkin mertebe müdâfaʿaya kıyâm etmişler idi. Ancak birkaç defʿa mağlûbiyet ile âlât-ı ceng ve mühimmâtları telef-şüde-i dest-i hâdisât ve mevcûd olan edevâtları dahi defʿ-i savlet-i aʿdâya vefâ etmeyüp, piyâde olanları Serʿasker Paşa ve Kul Kethudâsı ve birkaç mîr-i mîrân ile Silistire varoşuna dâhil ve süvârîleri birer tarafa râhil oldu. Bu haber semʿ-i Serdâr-ı ekremî'ye resîde oldukda, Karasu Serʿaskeri Nu'mân Paşa'ya hükm-i Sultânî ısdâr ve maʿiyyetinde olan dalkılıç ve sâyir asâkir-i mürettebe ile Silistire imdâdına berk-i hâtif ve rîh-i ʿâsıf gibi yetişmek husûsu gāyet-i te'kîd ile işʿâr olunduğundan başka, İbrâhîm Paşa'ya dahi; “Hayâtın lâzım ise müteferrik olan süvâriyânı ve Ordu-yi hümâyûn'da kable'l-vakʿa Mîr-i mîrânlık verilen Priştineli İsmâʿîl Ağa ve Mehmed Ağa ve Kahraman Paşa-zâde Tâhir Bey o tarafa ihrâc olunup, perâkende askeri ru'yetle ilerüye ıkdâmdan bu defʿa tecânüf eden mîr-i mîrânları dahi cemʿ ve maʿiyyetine alup, bir ân akdem Silistire imdâdına gidesün” deyü, hatt-ı kat'iyyu'l-medlûl tarafına mevsûl ve Karasu Serʿaskeri'ni tahrîk içün Süvârî Mukābelecisi 'Abdulkerîm Efendi mersûl olduğundan başka, Ruscuk Serʿaskeri'ne dahi emir gönderilüp, müsâʿade-i imkân derecesinde zehâyir ve asâkir ile Silistire'ye imdâd eylemesi zikr u beyân ve Ordu-yi hümâyûn'da baʿzı havâss u edʿiyyeye dahi müdâvemet ile taleb-i [M2 260] feth u nusrat kılınmışidi. Düşmen Silistire'yi muhâsaraya şurûʿ hılâlinde Tutrakān mukābilinden dahi leylen dört bin kadar küffâr çıkup, meterisde olan Kesriyeli ʿÖmer Ağa'nın üzerine gulüv ve berü tarafdan dahi mukābele ile ceng-cû oldular ise dahi âhar koldan imdâd olunmayup, meterisleri terk ile tâfte-rû olduklarını, muhâfızı olan Abaza Paşa Hazînedârı Feyzullah Paşa müşâhede ile: “Şu küffârdan kaça kaça ne olmalu, bundan sonra şu hayâtı neylemeli?" taʿbîriyle, kendin küffâra urup beş altısını iʿdâm ve kendüsü dahi birkaç yerinden mecrûh olup, birkaç sâʿatden sonra o şîr-i künâm-ı şecâʿat ü ikdâm cennet-i aʿlâyı makām eyledi. ʿÖmer Ağa'nın dört yüz kadar askerinin dahi vâfiri şehîd ve hâyiz-i zindegânî-yi medîd oldular. Feyzullah Paşa birkaç defʿa Tutrakan Maʿberi'ni geçüp, düşmeni kahr u tezlîl ve dil ü kelle alarak karşu tarafda dâstân-ı şecâʿati tertîl olunduğuna binâ'en, hüsn-i sûret ve iʿtidâl-i kadd ü kāmetine nazaran hayyen ahz olunması düşmen tarafından kasd olunmuşiken kābil olmayup, ʿâkıbet darb-ı dâne ile tîr-i şehâdete nişâne olup, düşmen bu hâle gam-nâk oldukları mütevâtir ve Ordu-yi hümâyûn'da bulunanlar dahi o dilîr-i Rüstem-nazîrin fıkdânı sebeb-i hüzn ve endûh-i mütekâsir oldu. Paşa-yı mûmâ ileyhin başında olan etbâʿın ekserîsi Abaza Paşa dâ'iresinden münşaʿib ü munfasıl ve âzmâyiş-i ceng ile kesb-i fünûn-ı harbiyye etmiş cesûr ve pür-dil kimseler olup, perîşân olmamaları niyyeti ile yine Abaza Paşa memâlîkinden Enderûn-ı hümâyûn'a çerâğ ve Baş-çukādârlıkdan nemâlı bir zeʿâmet ile nâyil-i ʿiyş-i rahîb ü refâğ olan Uzun ʿAbdullah Ağa'ya Mîr-î mîrânlık tevcîh olunup, levâzımı rü'yet ve iki üç gün zarfında Tutrakan tarafına Başbuğ nasb olunup, tahrîk-i râyet-i ʿazîmet edüp, münhal olan Baş-bakī Kulluğ'u Bekir Paşa Hazînedârı Selîm Ağa'ya ʿinâyet olundu.