Mısr-ı Kāhire'de Şeyhu'l-beled ve daʿvây-ı [M2 257] teferrüd ile bir zemân yenbûʿ-i fitne vü neked olan ʿAli Bey dâmâdı Ebû Zeheb savletinden firâr ile bir sene kadar Yafa taraflarında derdine dermân taleb, yaʿnî Mısır'a duhûl zımnında cûyây-ı vesîle vü sebeb olup, ʿâkıbet Zâhir ʿÖmer ile tervîc-i bazâr-ı nifâk ile ittihâd ü ittifâk edüp, Mısır'ın yağmâsına niyyet ve bu behâne ile vâfir cemʿiyyet peydâsıyla Mısır'a doğru ʿinân-tâb-ı ʿazîmet olduğu, Ebû Zeheb'in gûş-zed-i izʿânı oldukda, vücûh-i Kāhire'yi cemʿ ile bâgî-yi mezkûrun kasdını beyân ve üzerine sell-i seyf-i kahr u husrân maslahatını askerî ve sâyir ile baʿde'l-istişâre cümlesi bu emrin temşiyetine ber-zede-dâmân olduklarından gayri, vücûb-i izâlesi zımnında ʿulemây-ı Ezher ve mezâhib-i erbaʿa müftîleri müteʿaddid fetevâ iʿtâ ve Sâlihiyye'de hasm-ı nâ-bekâra iltikā ve Ebû Zeheb askeri ez-cân ü dil sadme-i bugāta mütehammil olarak ekserîsini tedmîr ve beylerin beş neferi ile müteʿayyin vâfir âdemlerini tuʿme-i şemşîr eylediler. Kāyid-i gürûh-i bugāt olan ʿAli Bey dahi, dört yerinde cerh-i kaviyyü't-te'sîr ile üftâde-i çâh-ı nâliş ü bîdâdî ve tevâbiʿ u levâhikı ile mektûfu'l-eyâdî olup, bâkīsi fülât ü be-yâbâna doğru firâr ve tahlîs-i cân-ı murdâr eylediler. Bu haber-i meserret-eser bâʿis-i inbısât-ı kihter ü mihter olup, darb-ı tabl-i şâdumânî ile kulûb-i nâsa ilkāy-ı sürûr-i câvidânî ve ol-müjde-i cân-behâ ile vârid olan şahs, Sadrıaʿzam'ın mazhar-ı cûd u ihsânı oldu.