Tatar tâyifesinin Rusyalu'ya mümâşâtları zuʿmlarına göre mâl ve ırzlarının vikāyesine mebnî bir keyfiyyet olup, el-yevm miyânelerinde münʿakid olan şurûtun hılâfı olarak, cevre dâ'ir baʿzı tavr müşâhadesiyle, ʿukelâsı Devlet-i ʿaliyye'den istigāse vü istinsâr ve bu meʾâli şâmil taraflarından pey-der-pey tahrîrât vürûduyla teʾessüf ve nedâmet izhâr eylediklerine binâʾen, silmen ve harben temşiyet-i mesâlihlerine Devlet-i ʿaliyye tarafından himmetde kusûr olunmayacağı taraflarına işâret olunmuşidi. Silmen tesviye-i hâllerine kader müsâʿade etmeyüp, fazl-ı Hakk ile harben tahsîl-i metâliblerine ikdâm olunmak husûsu, Rikâb-ı hümâyûn'da karar-gîr-i nizâm olup, sâbıkā Kırım Hân'ı Devlet Girây, çiftliğinden Âsitâne'ye ihzâr ve cemʿ-i asker-i cerrâr ile ülke-i Kırım'ın istıhlâsı esbâbı tarafından istifsâr olundukda, semt-i suhûlet-i mâddeyi bildiği kadar îzâh u takrîr ve Canikli ʿAli Bey maʿrifetiyle yirmi bin piyâde tahrîr ve Sinob ve sâyir o mahallere karîb iskelelerden sefâyine teşhîn ü imlâ ve nüfûz u iʿtibârına sebeb-i tezâyüd olmak içün mîr-i mûmâ ileyhin rütbe-i Vezâret'le kadr u menzileti iʿlâ olunup, Kırım cânibine bu cemʿiyyet-i kübrâ ile isrâ olundular. Bu keyfiyyet bundan akdem Hân nasbı ile bir müddetden berü Ruscuk ve Niğbolu semtlerinde beher şehr otuz beşer bin guruş taʿyînât-behâ ile tesmîn-i vücûd ve iddihâr-ı nukūd eden Maksûd Girây'ın maʿlûmu oldukda, izhâr-ı çîn ü cebîn-i infiʿâl ve: “Bu mâdde bizden bir kerre suʾâl olunmadan Devlet Girây Hân'ın Rikâb-ı hümâyûn'a daʿveti ve Kırım'a ʿazîmeti bizim bu mesnedden infisâlimize dâldir” deyerek, rebîʿulevvelin yirminci günü refʿ-i eskāl ve tevâbiʿ u levâhıkını alup, çiftliğine doğru matiyye-rân-ı istiʿcâl olduğu peyâmı, makām-ı Sadâret'den semʿ-i hümâyûna resîde olup, fi'l-hâl bisât-ı ikāmeti ber-çîde ve Tatar-pazarcığı'na nefy ve mücâzât olunmak bâbında safha-i sûʾ-i ʿameline hatt-ı hümâyûn keşîde kılındı.