Serʿasker-i sâbık Misivri muhâfazasına 'azîmet ve ordusunda bulunan askerin ekserîsi kendüye tebaʿiyyet ve bir mikdârı Karasu ordusunda ikāmet edüp, Nuʿmân Paşa vürûduna dek, İşbozlu 'Abdullah Paşa ber-minvâl-i muharrer icrây-ı lâzıme-i vekâlet ve 'illet-i kıllet ile herkes firâra hâzır ve düşmenin zuhûruna nigeh-dâr u nâzır olmuşlar idi. Hasm-ı nâ-bekâr vesâtat-ı reʿâyâ ile her bâr ehl-i İslâm ahvâlini istihbârdan hâlî olmayup, Serʿasker-i cedîdin bir mâha dek ancak umûru tesviye olunacağını cezm ile eyyâm-ı fâriğayı fursat ʿad edüp, Karasu ordusunu perîşân ve bulduğunu nehb ü tâlân etmek niyyet-i fâsidesinde olduğunu ru'esây-ı asker tahkīk u îkān etmeleriyle, bu keyfiyyeti o havâlîde mukīm olan Baht Girây Sultân Serdâr-ı ekrem'e beyân edüp, Varna ile Karasu'yun beyni yirmi beş sâʿati mütecâviz olmayup, hatb-ı Serʿaskerî müşârun ileyhin ʿuhdesine ihâle olunalı haylî vakit olup, bir sâʿat evvel hareket ve o tarafın istihkâmına gayret etmek lâzım iken, izhâr-ı betâ'et eylediğinden fazla hatt u tirhâline henüz kimse vâkıf olmadığına binâ'en, tekrâr istiʿcâli hâvî tarafına hükm-i Sultânî gönderilmişidi. Mâh-ı mezbûrun on sekizinci günü düşmen-i bed-peymân nümâyân ve fırka-i gâziyân-ı âl-i tîg u sinâna urup, dimâ-i müşrikîn ile rûy-i zemîn surh-fâm ve rü'ûs-i düşmen mühre-i şeşder-i harb u hısâm olup, taraf-ı hasm tezelzüle karîb ve top ve ce- behâneleri pür-dilân-ı muvahhidîne nasîb olacak hengâm cânib-i yemînde bulunan asker, akvây-ı esbâb-ı nusratdan olan sabr u sebâta riʿâyet etmeyüp, firâra mübâşeret ve bu keyfiyyet sâyirlere sirâyet ederek, terk-i kâr u bâr ve her biri bir tarafa firâr eyledi. Serʿasker Paşa hılâl-i râhda bozgun askere tesadüf edüp, bu hâl ile ilerü ʿazîmetde hatar ve henüz levâzım-ı Serʿaskerî'ye râbıta vermeden düşmen üzerine hücûmda zarar mülâhaza edüp, Bazarcığ'a ʿavdet üzere olduğu kasaba ehâlîsinin maʿlûmu oldukda, rücûʿunu bir vechile tecvîz etmeyüp, sekiz sâʿat ilerüde ârâm ve mümkin mertebe [M2 256] zâhîre ve sâyir cihetler ile iʿânet ü imdâdda kusûr etmeyeceklerini ifhâm etdiklerinden fazla, vukūʿ bulan mâ-cerâyı Ordu-yi hümâyûn'a dahi iʿlâm eylediler. Keyfiyyet cümle ile meşveret olunup, gāyet-i kelâm huzzâr bir mikdâr dalkılıç tahrîrinde karâr edüp, beş bin dalkılıç hîn-i tahrîrlerinden iʿtibâr olunarak tanzîm ü tertîb ve maʿiyyet-i müşârun ileyhe tesrîb ve bu cemʿiyyetin ru'esâsı hılaʿ u ʿatâyâ ile tatrîb olundu.