Mîr-i mîrân'dan Terekeme-zâde Hasan Paşa Babadağı muhârebesinde pîşvây-ı firâriyân olmak töhmetiyle, Çavuş-başı Ağa dâyiresinde katîl-i seyf-i sakīl ve mûcib-i 'ibret-i kavîyy ü za'îl oldu. Mertin [Marten] vakʿasında bend-kemend-i isâr olan Rusyalu ve zûr-i bâzû-yi İslâm ile igtinâm olununan baʿzı âlât-ı harbiyye Ordu-yi hümâyûn'a vürûd ve bu zafer-i 'azîzü'l-vücûd sebebi ile zümre-i muvahhidîn ser-be-zemîn hayyiz-i sücûd ve şükür-güzâr-ı cenâb-ı Maʿbûd oldular. Zikr olunan üserâ vü edevât-ı sâyire ʿarabalara tahmîl ve Âsitâne-i saʿâdet tarafına tesbîl olunup, Repnin Ceneral'in birâderi zahm-dâr ve 'araba ile 'azîmete ʿadîmü'l-iktıdâr olup, zahmi tımâr olunmak içün Re’îs Efendi dâyiresinde mesfûra bir çadır nasb olunup, 'illetden ifrâk ihsâsıyla ol dahi refîklerine verâdan ilhâk olundu. Bu defʿa dahi taraf-ı hümâyûndan gazâ vü cihâda igrâ vü tahrîz siyâkında bir kıtʿa hatt-ı hümâyûn şeref-rîz-i sudûr olup, alâ rü'ûsi [M2 255]'l-işhâd kırâ'et olunup, mazmûn-ı münîfi cümleye iʿlân ʿakabinde sunûf-i asâkir-i Pâdişâhî'nin bir kıst mevâcibleri dahi ihrâc ve enbân-ı emânet-kârâna idrâc olunup, vazîfe-horân-ı Devlet-i ebed kıyâm duʿâ-yı Şâhâne'yi resîde-i heft-icrâm eylediler.