Rumeli Vâlîsi ve Karasu Serʿaskeri Vezîr ʿAbdî Paşa'nın dâyiresi perîşân ve ʿuhdesinde Rumeli Eyâleti gibi kesîru'l-cedvâ bir mansıb var iken, bir hidmet-i nâfiʿaya muvaffak olamadığı şimdiye dek vukūʿ bulan keyfiyyâtdan müstebân olup, bâ-husûs Babadağı üzerine [M2 254] bu defʿa gelen küffârın defʿ-i mazarratında kusûr eylediği maʿlûm-i Sadru's-sudûr olduğundan başka, Çavuş-başı İspir Ağa bu maʿnâya mülâyim îrâd-ı kīl ü kāl ve: “Eğer ʿazl olunmaz ise aʿdânın berü taraflara tecâvüzü ağleb-i ihtimâldir” deyerek, teşvîr-i gazab ve hâh-nâ-hâh müşârun ileyhin ʿazline sebeb olup, Varna Muhâfızı es-Seyyid Nuʿmân Paşa ʿillet-i sameme mübtelâ ve ru'yet-i umûrda ʿaczi maʿlûm-i aʿlâ vü ednâ iken, sevk-i kazâ vü kader ile Serʿaskerlik ve Rumeli Eyâleti hakkında cilve-ger olup, mâh-ı mezbûrun on altıncı günü ʿAbdî Paşa maʿzûl ve ber-minvâl-i muharrer müşârun ileyh bu iʿtibârât ile nâyil-i eʿazzi me'mûl oldu. Serʿasker-i cedîdin süvâr-ı cemʿiyyeti teksîr irâdesiyle, yedi yüz nefer sipâh ve silâhdâr serdengeçdîleri ve zî-kudret ve sâyirden müretteb üç bin nefer piyâde maʿiyyetine firistâde olunup, Sivas Eyâleti ʿAbdî Paşa'ya tevcîh ve Misivri Muhâfazası'na ʿazîmet eylemesi te'kîd ü tenbîh ve Karasu etrâfına ʿAbdî Paşa gereği gibi takviyyet ve hafr-i meteris ve tabyalar inşâsıyla metânet verüp, Nuʿmân Paşa varıncaya dek bu usûl tağyîr kabûl etmemek içün Mîr-i mîrân'dan İşbozlu ʿAbdullah Paşa Serʿasker Paşa'ya tevkîl ve Varna muhâfazası Mîr-i mîrân'dan Seyyid Ahmed Paşa'ya tahvîl olundu.