Her cânibden düşmen-i ʿanîd üzerine sevk-i ketâʾib-i muvahhidîn husûsları, evâmir-i ʿaliyye ile [M2 253] teʾkîd olunup, Ruscuk Serʿaskeri dahi maʿiyyetinde olan asâkir ile Yergöğü Kalʿası'nı istıhlâs etmek üzere meʾmûr ve bu bâbda birkaç defʿa tarafına irsâl-i menşûr kılınmışidi. Fi'l-vâkiʿ müşârun ileyh merreten baʿde uhrâ karşu tarafa asker imrâr ve eşrâr-ı küffâr kalʿanın etrâfını metîn tabya ve meterisler ile muhkem ü üstüvâr edüp, kalʿaya zafer ʿasîr olduğundan, hâricde düşmen ile tarh-ı kurʿa-i dâr ü gîr ve yine Ruscuğ'u mevʾil ü masîr ederler idi. Düşmen bu reftâra mukābele kasdıyla iki tarafdan Ruscuk üzerine hücûm eyledikleri maʿlûm olmağla, asker-i İslâm dahi hâzır ve düşmenin zuhûruna nâzır olup, Ruscuğ'a üç sâʿat mesâfede vâkiʿ Mertin (مرتین) [Marten] nâm mahalle vusûl ve top ve sâyir mühimmâtını taşraya ihrâc ile mahall-i mezkûru zabta meşgûl oldu. Muhâfazaya me'mûr sunûf-i asâkir ile Bosna'nın zuʿamâ vü erbâb-ı tîmârı dest-zen-i ittihâd ve aʿdâ üzerine âteş-i ceng ü kıtâli îkād eyledikleri hengâmda sadây-ı top Serʿasker Paşa'nın mesmûʿu olup, dâyiresinde mevcûd ve muhâfazada bulunan cünûd-i zafer-mevʿûd ile çarha toplarını istishâb ve berren ve nehren mahall-i cidâle ʿazm ü şitâb eyleyüp, bir hamlede cünûd-i aʿdâyı kesr ve her tarafdan düşmeni mübtelây-ı kahr u esr edüp, ecel-i nâ-resîdelerinin bir mikdârı nehre gark ve bir mikdârı Yergöğü'de olan cemʿiyyetgâhlarına mülhak olup, iki yüz mikdârı esîr bend-i zencîr ve üç kıtʿa top ve vâfir Açığları zabt olunduğundan gayri, zâbitlerinin ekseri vâsıl-ı dereke-i nâr-ı saʿîr ve Repnin Ceneral'in birâderi dahi mecrûhan giriftâr-ı şikâl-i isâr olduğu müşârun ileyh tarafından Serdâr-ı ekrem hazretlerine ʿarz u tahrîr olunmağla, der-ʿakab izhâr-ı şâdumânî vü surûr ve Serʿasker Paşa'ya bir sevb-i semmûr ile bir kabza mücevher kılıç ibʿâs olunup, maʿiyyetinde olan mîr-i mîrân ve rü'esây-ı askerîye dahi hilaʿ ve çelenk irsâliyle şevk u himmetleri mevfûr kılındı.