Hulûl-i eyyâm-ı behâr ile zuhûr-i bidâyet-i ceng ve her kolda mücâvezeten ve muhâfazatan iʿmâl-i seyf ü tüfeng iktizâsıyla, Serdâr-ı ekrem'in Şumnu Sahrâsı'na rekz-i aʿlâm ve düşmenden ahz u intikām mekāsıdı erkân-ı devlet ve hayr-hâhân-ı saltanat taraflarından ilkā vü teşvîk ve ittifâk-ı ârâ ile saferu'l-hayrın yirmi birinci hamîs günü hareket tahkīk olunup, müretteb alay ile nasb olununan hıyâm-ı sebzîn-fâma nüzûl ü ilmâm ve râbıta-i ceng ü husûmeti teşyîd ü ihkâm eylediler. Ordu Kadısı Niʿmetullah Efendi irtıhâl ve yerine bir zâtın ibdâl olunmak husûsu, mukaddemâ Südde-i saʿâdet'e ʿarz u imlâ olunmuşidi. Fıkh-ı şerîfde Keydânî ve sâyir ʿulûmda Teftazânî olan sâbıkā Galata Kadısı Müftî-zâde Ahmed Efendi intihâb ve üç bin guruş harçlık ile ıtrâb ve Ordu-yi hümâyûn'a izhâb olunmuşidi. Evâyil-i saferde Ordu-yi hümâyûn'a kādim ve ilbâs-ı hılʿat ile meʾmûr-i fasl-ı miyân-ı mazlûm u zâlim oldu. Ağa-Paşa Kul Kethudâsı'ndan şikâyet ve ʿillet-i bihre mübtelâ olduğunu hikâyet ile baʿzı esrâr iblâğında netn-i dehânından müte'ezzî olduğunu ifâde ve ʿazlini irâde etmekle, recâsı karîn-i müsâʿade olup, ʿazl ve Selvi tarafına irsâl ve Zağarcı-başı Yeğen Mehmed Ağa, Kul Kethudâlığı'yla muhassilü'l-âmâl kılındı. Maʿzûl-i mûmâ ileyh gāyet cesûr u cerî ve tâyife-i Yeniçeri şiddet-i siyâsetle fermân-berî olup, tetâvul-i ezmine ile Bağdâd Ağalığı'nda dahi vâfir şeyʾ iddihâr ile sâhib-i servet ü yesâr olduğundan, Ağalığ'a ʿamel etmek hâtırası Ağa Paşa'nın şuʿurunu muhtel edüp, bu mahzûru defʿ ile nefsini tervîh ve mûmâ ileyhi tekdîr ü tebrîh eyledi.