Düşmen ile Babadağı mâ-beyni dört beş sâʿat mesâfe olup, sulh mâddesi dahi mechûl iken, o kadar ümmet-i Muhammedi girdâb-ı belâya ilgā etmek fi'l-hakīka tedbîr-i zaʿîf ve re'y-i sahîf idi. Belki düşmenin memerrini gavr-i mâ ve şenliğinden ihlâ ile seyr ü hareketlerin tasʿîb kesb-i emniyyet ve defʿ-i gā'ile-i düşmene sebeb-i karîbdir. Çin halkı Moskovlu'nun teʿaddîsinden bî-zâr olup, hudûdlarında vâkiʿ nehr-i kebîrin öte yakasında vâkiʿ on günlük memleketlerini fedâ ve kendü elleriyle tahrîb ü ifnâ edüp, âbâr u cedâvili nehr-i kebîre icrâ ve o mikdâr mesâfeyi arz-ı Tîh ve ʿimâretden hâlî deşt ü sahrâ gibi etmeleriyle Moskovlu'nun ağır asker ile gelüp, teʿaddî ve fesâdından sâlim ü âzâde oldular. Hattâ Moskov tüccarı hafaza ile nehr-i mezbûrun berü yakasına gelüp, metâʿlarını terk ve gerü çekilüp, Çînîler dahi nehri mürûr ve metaʿları kadar memleketleri bizâʿatını taʿdîlen vazʿ ve gerü çekildikleri zemân karîbe dek miyânelerinde cârî bir muʿâmele olduğu meşhûrdur. Babadağı vakʿası sâmiʿa-i Sadrıaʿzamî'ye resîde ve feyâlet-i re'yinden nâşî tekevvün eden mâdde-i müzʿiceden mütekeddir ve rencîde olup, fi'l-hâl [M2 252] Çavuş-başı olan İspir Ağa'yı Deli-orman askeriyle ve Bostancı-başı'yı mevcûd-i maʿiyyeti ile ʿAbdî Paşa tarafına gönderüp, bu cemʿiyyet ile Babadağı'na varmak niyyetinde iken, düşmen o tarafları nehb ü yağma ve istîlâʾ etdiği Kara-harmanı bırakup, Tulça tarafına raht-ı hay- bet ve ʿavdeti ilkā eylediler. Bundan sonra Çavuş-başı orduya ve Bostancı-başı Edirne'ye bî-fevz ü zafer ʿavdet ve: “Düşmeni kaçırdık” deyerek kesb-i mefharet eylediler.