Bâlâda beyân olunduğu vech üzere, maslahat-ı sulh ʿukde-i ʿusrete dûçâr ve iki tarafdan âsâr-ı husûmet ü nefâr be-dîdâr olup, nevrûza birkaç gün kalarak düşmen-i bed-endîş Silistire ile Hırsova miyânında vâkiʿ Balya Boğazı'ndan ve Tulça'dan berü taraflara mürûr ile kulûb-i İslâm'a ilkāy-ı ihtilâc ü teşvîş eyledikleri, mesmûʿ-i Sadr-gayret-kîş olmağla, Silistire Serʿaskeri Vezîr ʿOsmân Paşa'ya ve sevâhilde bulunan sâyir muhafızlara ekîd ü şedîd emr-i ʿâlî ısdârıyla, hazele-i müşrikîn tebʿîd ve geldikleri semte terdîd olunmuşlar idi. Tulça tarafından ser-nümây-ı vâdî-yi gurûr olan düşmen-i makhûrun dahi defʿ-i şurûrları Bazarcık Serʿaskeri ʿAbdî Paşa'ya ve bâ-husûs Babadağı muhafızı mîr-i mîrândan Çerkes Paşa'ya sipariş olunup, Serʿasker-i müşârun ileyhin birkaç defʿa esbâb-ı sâmâni nehb-kerde-i aʿdâ ve nemây-ı mansıbı mütesellimler yedinde telef ü hebâ olduğundan gayri, maʿiyyetinde olan Rumeli Eyâleti askeri dahi imtidâd-ı mütâreke hasebiyle sulhun inʿıkādını ictihâd ve harçlıkçı nâmıyla ekserîsi vilâyetlerine gidüp, yanında bulunan cüz’î asker ile imdâd mümkin olmadığı ve Babadağı ile Bazarcık mâbeyni kırk sâʿat mesâfe olup, şenlikden hâlî olmak hasebiyle hareket ve iʿâneye mecâlî olmayup, Çerkes Paşa dahi imdâddan nâ-ümmîd ve Babadağı Kasabası'nda olan evlad ü ʿiyâli semt-i selâmete ihrâc maslahatını re'y-i sedîd ʿadd etmekle, cümlesini Bazarcığ'a irsâl ve kendüsü Sivas Eyâleti ve sâyir maʿiyyetinde olan asker-i endek-şümâr ile mutarassıd-ı kâr-zâr olmuşidi. Düşmen dahi taburunu tertîb ve Babadağı pîşgâhında âmâde-i ceng olan İslâm dilâverlerine karîb oldukda, dört beş sâʿat kadar muhârebe ve tarafeynden iʿmâl-i âlât-ı mudârebe olunup, asker-i İslâm fevz ü zaferi igtinâm hengâmında Terekeme-[M2 251]oğlu ile baʿzı nâmerd, terk-i neberd ve Bazarcığ'a doğru firâr ve bakıyye-i asker dahi bunlara kafadâr olarak gayret-i dîniyyelerini târ ü mâr eylediler. Düşmen-i dîn Babadağı'ndan ihrâc olunan ʿıyâl ü evlâd ʿarabalarını taʿkīb ile bir mikdârını zabt eylediklerini Karasu cânibinde meştâ-nişîn olan Baht Girây Sultân istihbâr ve Babadağı'ndan müteşerrid ecnâdın baʿzısını tevkīf ve istishâb ile fi'l-hâl ilgār ve hayâl-i ganîmet ile karyelere münteşir olan eşrâr-ı küffârı hedef-i tîr-i belâ ve yedlerine giriftâr olan ʿarabaların bir mikdârını istihlâs ile hakk-ı niʿmet-i Şâhâne'yi icrâ eyledi. Sadr-ı sâbık zemânında hudûs eden vakʿa-i dil-hırâşdan hezâr-ı mihnetle vâreste olan Babadağı halkını Sadrıaʿzam bulunan Muhsin-zâde husûlü meşiyyet-i İlâhiyye'de olan keyfiyyet-i sulhu cezm ve gayba hükm ile vilâyetlerine iʿâde ve hars ü zirâʿatle meşgûliyyetlerini te'kîd ü ifade edüp, ʿavdet-i ceng tehakkukunda ya muhâfaza ve yâhud bir mahalle nakl dâʿiyesine düşmeyüp, derd-mendlerin ekserîsini meʾsûr-i aʿdây-ı bed-sigāl ve bu mukābelede kesb-i vizr ü vebâl eyledi.