İnkızây-ı müddet-i mütâreke ile murahhasların ʿavdeti âteş-i cengi ʿalevgîr ve iki taraf tertîb-i mukaddemât-ı dâr u gîr edüp Varna, Ordu-yi hümâyûn'un el-hâletü hâzihi iskelesi olmak hasebiyle, vücûb-i muhâfazası vârid-i hâtır ve Pravadi (Provadia) Meştâsı'nda mukīm olan Vezîr es-Seyyid Nuʿmân Paşa'nın emr-i muhâfazaya me'mûriyyeti, muvâfık-ı re'y-i ekâbir olduğuna binâʾen, müşârun ileyh Varna'ya varmak üzere Dîvân-ı ʿâlî'den fermân-ı celîlü'ş-şân sâdır oldu. Başıboş askerde nizâm ve me'mûr oldukları mahallerde devâm ile pâ-bercây-ı merkez-i sebât ü kıyâm olmadıkları, mücerreb-i hâss u ʿâmm olduğuna binâʾen, Serdâr-ı ekrem ve sâyir ʿuzamây-ı devlet dâ'irelerinde bi-hasebi'l-imkân Tüfengçi ʿunvânıyla birer mikdâr âdem tahrîr olunsa, vakt ü bî-vakt müretteb asker gibi derdest bulunup, lüzûmu olan mahallere tîz elden irsâl ile izhâr-ı tâb ü tüvân edecekleri nümâyân olmağla, ʿulûfe ve kisve ve taʿyînâtları taraflarından verilmek üzere ibtidâ Sadrıaʿzam hazret- leri bin nefer ve Defterdâr Efendi iki yüz nefer ve Re’îs Efendi ve Çavuş-başı Ağa ve Sipâh ve Silahdâr ağaları yüz ellişer nefer ve Cebecî ve Topçu ve ‘Arabacı-başı ağalar yüzer nefer piyâde tahrîrine mübâşeret ve birkaç gün zarfında kisveleri tanzîm olunup, pîşgâh-ı Serdâr-ı ekremî'den alay irâ'eti ile her fırka dâyiresine mülâzemet eylediler.